இராணுவ மயப்படுத்தல்கள் அதிகரித்துள்ளன! வடக்கின் ஆளுனராக சிவிலியன் ஒருவரை நியமிக்கவும்!– மனோ கணேசன்

அபிவிருத்தியின் மூலம் மட்டும் ஆசியாவில் ஆச்சரியத்தை ஏற்படுத்த முடியாது: நிமல் சிறிபால டி சில்வா

[ திங்கட்கிழமை, 21 யூலை 2014, 01:58.41 AM GMT ]

கொங்கிறீட் பாதைகள், கட்டடங்களின் மூலம் மட்டும் ஆசியாவில் ஆச்சரியத்தை ஏற்படுத்த முடியாது என அமைச்சா் நிமல் சிறிபால டி சில்வா தெரிவித்துள்ளார்.

எவ்வளவு உட்கட்டுமான வசதிகள் ஏற்படுத்திக் கொடுக்கப்பட்டாலும் இளைஞர் சமூகம் அதிருப்தியில் இருந்தால் அந்த சமூகம் நீடித்திருக்காது.

பௌதீக வள அபிவிருத்தியுடன் மனித வளத்தை அபிவிருத்தி செய்வது மிகவும் அவசியமாகின்றது.

இந்த நாடு சில கிளர்ச்சிகளை சந்தித்துள்ளது. இவ்வாறான கிளர்ச்சிகள் ஏற்படக் கூடிய வாய்ப்புக்களை முடக்குவதே மஹிந்த ராஜபக்ச அரசாங்கத்தின் நோக்கமாகும்.

இளைஞர் சமூகத்திற்கு உரிய தொழில் பயிற்சிகளை வழங்கி, அவர்களின் ஆளுமையை விருத்தி செய்ய நடவடிக்கை எடுக்கப்படும்.

தேசிய ஒற்றுமை குறித்து பாடம் கற்பிக்கும் சர்வதேச சமூகத்திற்கு இளைஞர் படையணியின் ஊடாக பதிலளிக்க முடியும் என அமைச்சர் தெரிவித்துள்ளார்.

அண்மையில் பதுளையில் நடைபெற்ற நிகழ்வு ஒன்றில் பங்கேற்ற போது அமைச்சர் இதனைத் தெரிவித்துள்ளார்.

http://www.tamilwin.com/show-RUmsyHRVLcls1.html

இராணுவ மயப்படுத்தல்கள் அதிகரித்துள்ளன! வடக்கின் ஆளுனராக சிவிலியன் ஒருவரை நியமிக்கவும்!– மனோ கணேசன்

[ திங்கட்கிழமை, 21 யூலை 2014, 02:10.11 AM GMT ]

நாட்டில் இராணுவ மயப்படுத்தல்கள் அதிகரித்துள்ளதாக ஜனநாயக மக்கள் முன்னணியின் தலைவர் மனோ கணேசன் குற்றஞ்சாட்டியுள்ளார்.

வடக்கின் ஆளுனராக இரண்டாவது தடவையாகவும் இராணுவ அதிகாரியொருவர் நியமிக்கப்பட்டுள்ளார்.

வடக்கில் லயனல் பெர்னாண்டோ என்ற சிங்கள ஆளுனர் தேர்தலில் போட்டியிட்டால் வெற்றியீட்டலாம் என்ற கருத்து நிலவியது. அவ்வாறான ஓர் சிவிலியன் ஒருவரை ஆளுனராக நியமிக்கவும்.

நாட்டின் சகல நிறுவனங்களிலும் இன்று இராணுவ அதிகாரிகள் பதவி வகிக்கின்றனர். இதற்குத்தான் நாம் இராணுவ மயமாக்கல் என்கின்றோம்.

அடுத்த தடவை நடைபெறவுள்ள ஐக்கிய நாடுகள் மனித உரிமைப் பேரவை மாநாட்டின் போது ஐரோப்பா, ஆபிரிக்கா மட்டுமன்றி மத்திய கிழக்கு நாடுகளினதும் ஒத்துழைப்பை இலங்கை இழக்க நேரிடும்.

தென் ஆபிரிக்க துணை ஜனாதிபதி சிரில் ரமபோசா இலங்கைக்கு விஜயம் செய்த போது இடம்பெற்ற சம்பவங்களினால் ஆபிரிக்க நாடுகளின் உதவியை இழக்க நேரிடும்.

அளுத்கம பேருவளை சம்பவங்களினால் மத்திய கிழக்கு நாடுகளின் ஒத்துழைப்பை இழக்க நேரிடும்.

அரசாங்கத்தின் வெளியுறவுக் கொள்கைகளில் காணப்படும் குறைபாடுகளே வெளிநாடுகளின் ஒத்துழைப்பை இழக்கக் காரணம்.

வெளிவிவகார அமைச்சர் இதற்கான பொறுப்பினை ஏற்றுக்கொண்டு தனது பதவியை இராஜினாமா செய்ய வேண்டும்.

வடக்கின் ஆளுனராக சிவிலியன் ஒருவரை அரசாங்கம் உடனடியாக நியமிக்க வேண்டுமென மனோ கணேசன் கோரியுள்ளார் என சிங்களப் பத்திரிகையொன்று செய்தி வெளியிட்டுள்ளது.

http://www.tamilwin.com/show-RUmsyHRVLcls3.html