இந்தியா 100 வீதம் தமிழ் தேசியக் கூட்டமைப்புடன் இருக்கும்! மோடி, சம்பந்தன் குழுவினரிடம் கூறியவை என்ன?

போரோபுதூர் விகாரை மீது தாக்குதல் நடத்தப்பட்டால் அமெரிக்காவே பொறுப்பு: தேசிய சுதந்திர முன்னணி

[ ஞாயிற்றுக்கிழமை, 31 ஓகஸ்ட் 2014, 11:22.58 AM GMT ]

உலகில் மிகப் பெரிய பௌத்த விகாரை என கருதப்படும் இந்தோனேசியாவின் போரோபுதூர் (Borobudur) விகாரை மீது தாக்குதல் நடத்தப்பட்டால், ஐ.எஸ்.ஐ.எஸ். என்ற இஸ்லாமிய அடிப்படைவாத அமைப்பை உருவாக்கி போஷித்து வளர்த்த அமெரிக்காவே பொறுப்புக் கூறவேண்டும் என தேசிய சுதந்திர முன்னணி தெரிவித்துள்ளது.

கொழும்பில் இன்று நடைபெற்ற ஊடகவியலாளர் சந்திப்பில் உரையாற்றிய அந்த முன்னணியின் பேச்சாளரும் முன்னாள் நாடாளுமன்ற உறுப்பினருமான மொஹமட் முஸ்ஸாமில் இதனை கூறியுள்ளார்.

ஸ்லெட்போர்ம் இணையத்தளம் மற்றும் பேஸ்புக் சமூக வலைத்தளம் ஊடாக உலகில் மிகப் பெரிய பௌத்த விகாரையான போரோபுதூர் விகாரை மீது தாக்குதல் நடத்தப் போவதாக ஐ.எஸ்.ஐ.எஸ். அடிப்படைவாத அமைப்பு தெரிவித்துள்ளது.

இதனை இலங்கையில் மாத்திரமல்லாது உலகில் சமாதானத்தையும் சகவாழ்வையும் விரும்பும் மற்றும் வரலாற்று சிறப்புமிக்க உரிமைகளை மதிக்கும் பௌத்தர்கள் மட்டுமல்ல அனைத்து மதத்தினரின் விமர்சனங்களுக்கு உள்ளானது.

அமெரிக்கா, பிரித்தானியா உட்பட மேற்குலக நாடுகள் ஈராக்கின் எண்ணெய் வளத்தை கொள்ளையிட அந்த நாட்டை ஆக்கிரமித்தன.

சதாம் உசேனை தூக்கிலிட்டுக் கொலை செய்தனர். போராளிகளுக்கு நவீன ஆயுதங்கள், வாகனங்களை கொடுத்து போஷித்து வளர்த்து சதாம் உசேனை கொலை செய்தனர்.

அமெரிக்கா, ஐ.எஸ்.ஐ.எஸ். அமைப்புக்கு உதவிகளை வழங்கிய விதம் உலகத்திற்கு ஏற்கனவே வெட்டவெளிச்சமாகியது.

ஐ.எஸ்.ஐ.எஸ். அமைப்பு அமெரிக்காவின் அடிப்படைவாத உருவாக்கம் என்பது மிகத் தெளிவானது எனவும் முஸ்ஸாமில் குறிப்பிட்டுள்ளார்.

இலங்கையில் அராபிய கலாச்சாரம் வேண்டாம்: தேசிய சுதந்திர முன்னணி

இலங்கையின் முஸ்லிம்கள் அராபிய கலாச்சாரத்தை பின்பற்றுவதால் சமூக பிரிவினைகள் ஏற்படும் என்று தேசிய சுதந்திர முன்னணியின் பேச்சாளர் மொஹமட் முஸம்மில் எச்சரிக்கை விடுத்துள்ளார்.

இஸ்லாம், இலங்கைக்கு அராபியாவில் இருந்து வரவில்லை. இந்தியா மற்றும் ஆசியாவில் இருந்தே வந்தது.

இந்தநிலையில் முஸ்லிம் பெண் ஒருவர், தமது தலையை சாரியின் மூலமே மறைக்கும் பழக்கத்தை கொண்டிருந்தார்.

எனினும் இன்று பலர் “அபாயா” என்ற ஆடையை கொண்டு தமது தலையை மறைக்கின்றனர்.

இது இலங்கையின் சமூகங்களுக்கு இடையில் பிரிவினையை ஏற்படுத்திவிடும் என்று முஸம்மில் குறிப்பிட்டார். சில குழுக்கள் அராபிய நாகரீகத்தை இலங்கையில் புகுத்த முயற்சிக்கின்றன.

எனவே ஈராக்கில் அவர்கள் செய்ததை இலங்கையில் செய்ய அனுமதிக்கக்கூடாது என்று முஸம்மில் கேட்டுக்கொண்டார்.

http://www.tamilwin.com/show-RUmsyIQVKUlp6.html

தனக்குத் தானே மண் வாரிய அரசியல் கோமாளி சுப்பிரமணியன் சுவாமி

[ ஞாயிற்றுக்கிழமை, 31 ஓகஸ்ட் 2014, 11:42.47 AM GMT ]

இந்திய அரசியலில் கோமாளி என்று பொதுவாக வர்ணிக்கப்படும் சுப்பிரமணியன் சுவாமி, இலங்கையிலும் அவ்வாறே கருதப்படும் நிலையொன்றை தனக்குத் தானே உருவாக்கிக் கொண்டிருக்கிறார்.

கடந்த சில ஆண்டுகளாகவே இலங்கை அரசாங்கத்துடன் நெருக்கத்தை ஏற்படுத்திக் கொண்டுள்ள, சுப்பிரமணியன் சுவாமி, வெளியிட்டு வரும் கருத்துக்கள், இலங்கையிலும், தமிழ்நாட்டிலும் உள்ள தமிழர்கள் மத்தியில் விசனத்தை ஏற்படுத்தி வருவது வெளிப்படை.

புதுடில்லியில் பா.ஜ.க. ஆட்சியமைத்த பின்னர், கடந்த மூன்று மாதங்களில் அவர் இரண்டு முறை இலங்கைக்குப் பயணம் மேற்கொண்ட போதும், வெளியிட்ட பல கருத்துக்கள் அவரது கண்முன்பாகவே பொய்யாகிப் போயின.

சுப்பிரமணியன் சுவாமி தன்னை ஒரு மாபெரும் இந்தியத் தேசியவாதியாக காட்டிக் கொண்டு, வெளியிட்டு வரும் கருத்துக்கள், இந்திய மத்திய அரசுக்கும் நெருக்கடிகளை ஏற்படுத்தக் கூடியவை.

அதனால் தான், எந்த அதிகாரமுமில்லாத சுப்பிரமணியன் சுவாமி இலங்கை தொடர்பாகவும், வெளிவிவகாரக் கொள்கை தொடர்பாகவும், வெளியிட்டு வரும் கருத்துகள் குறித்து இந்திய அரசாங்கம் எச்சரிக்கையோடு இருக்க வேண்டும் என்று சர்வதேச ஊடகம் ஒன்று எச்சரித்திருந்தது.

தனது கொழும்பு பயணங்களின் போது சுப்பிரமணியன் சுவாமி, பல ஊடகங்களுக்கு நீண்ட பேட்டிகளை கொடுத்திருந்தார். அவை எல்லாவற்றிலும், தான் இந்திய அரசின் அதிகாரம் மிக்க ஒருவர் போலவும் முடிவுகளை எடுக்கும் நிலையில் உள்ளவர் போலவும் கருத்துக்களைக் கூறியிருக்கிறார்.

இந்தியப் பிரதமரோ, வெளிவிவகார அமைச்சரோ கூட இதுபோன்று நேரடியாகப் பதிலளிக்க மாட்டார்கள். ஆனால், சுப்பிரமணியன் சுவாமிக்கு, எந்தப் பொறுப்பும் இல்லாததால், அவரால் ஒரு நாடக நடிகரைப் போன்று தானே அதிகாரம் மிக்க நபர் என்று கருதிக் கொண்டு, கருத்துக்களை வெளியிட்டு வருகிறார்.

மிக அண்மைக்காலத்தில், அவர் வெளியிட்ட சில தகவல்களும் கருத்துக்களும், சர்ச்சைகளை மட்டும் ஏற்படுத்தவில்லை, கோமாளித்தனமாகவும் இருந்தன.

“மோடி ஆட்சியின் கீழ் இந்தியா" என்ற தலைப்பில் கொழும்பில் நிகழ்த்திய உரையில், இலங்கை - இந்திய உறவுகளில் இருந்து, தமிழ்நாட்டையும், தமிழர் பிரச்சினையையும் நீக்க வேண்டும் என்று கூறியிருந்தார் சுப்பிரமணியன் சுவாமி.

அதாவது, இந்த இரண்டு விவகாரங்களையும் மறந்துவிட்டு, இரு நாடுகளும் உறவுகளை பலப்படுத்த வேண்டும் என்பதே அவரது கருத்தின் அடிப்படை. ஆனால், அது நடைமுறைச் சாத்தியமற்றது.

ஏனென்றால், தமிழர் பிரச்சினை, தமிழ்நாடு, இந்தியா, இலங்கை இந்த நான்குமே ஒன்றுடன் ஒன்று பின்னிப் பிணைந்தவை. இவற்றை ஒதுக்கி விட்டு, இரண்டு நாடுகளும் உறவுகளைப் பலப்படுத்திக் கொள்வதென்பது, முடியாத காரியம். அவ்வாறானதொரு முயற்சியில் இறங்கினால், அது, தமிழ்நாட்டையும், இலங்கைத் தமிழர் பிரச்சினையையும், தனிமைப்படுத்துவதாக அமையும்.

அது புதிதான பிரிவினைக் கோரிக்கைகளுக்கும் வழிவிடலாம். இலங்கைத் தமிழர் பிரச்சினைக்கு தனிநாடு அமைவதை இந்தியா எதிர்ப்பதற்குக் காரணம், தமது நாட்டிலும், அத்தகைய பிரிவினைக் கோரிக்கைகளைப் பலப்படுத்திவிடும் என்பதேயாகும்.

சுப்பிரமணியன் சுவாமியின் யோசனைப்படி நடந்து கொண்டால், இந்தியா எதையிட்டு அஞ்சுகிறதோ, அது தானாகவே உருவாகும் என்பதில் சந்தேகமில்லை. இலங்கை இராணுவம் நடத்தும் பாதுகாப்புக் கருத்தரங்குகளில், இப்போது சுப்பிரமணியன் சுவாமி தவிர்க்க முடியாத ஒரு பிரமுகராகி விட்டார்.

காரணம், அவர் தமிழர் விரோதக் கருத்துக்களை தாராளமாகவே அள்ளிவீசக் கூடியவர். சுப்பிரமணியன் சுவாமி மூலம் தமிழர் விரோதக் கருத்துக்கள் வெளிப்படுவதையிட்டு அரசாங்கத்துக்குச் சங்கடமில்லை.

ஆனால் இதையே சிங்கள புலமையாளர் ஒருவரைக் கொண்டு வெளியிட்டால் அதற்கு வேறு அர்த்தம் கற்பிக்கப்படும். எனவே தான், இராணுவத்தின் பாதுகாப்புக் கருத்தரங்குகளில் சுப்பிரமணியன் சுவாமி நிரந்தரமான விருந்தினராகி விட்டார்.

இம்முறை, பாதுகாப்புக் கருத்தரங்கிற்கு சுப்பிரமணியன் சுவாமி கலந்து கொள்வதற்கு தமிழ்நாட்டில் எதிர்ப்புக் கிளம்பிய போது, தான் அதில் பங்கேற்றே தீருவேன் என்று மதுரையில் செய்தியாளர்களிடம் அடித்துக் கூறினார்.

அதுமட்டுமன்றி, இந்தக் கருத்தரங்கில் தான், இலங்கைக்கு எந்த நாடு எந்தளவு இராணுவ உதவிகளை செய்யப் போகிறது என்று தீர்மானிக்கப்படும் என்றும், சீனா என்ன இராணுவ உதவிகளை வழங்கப் போகிறது என்று கண்காணிப்பதற்காக தான் அங்கு சென்றேயாக வேண்டும் என்றும் அவர் கூறியிருந்தார்.

இலங்கை இராணுவத்தின் பாதுகாப்புக் கருத்தரங்கின் நோக்கத்தை அவர் விளங்கிக் கொள்ளவில்லையா அல்லது தமிழ்நாட்டுக்காரர்கள் எதுவும் தெரியாத முட்டாள்கள் என்று அவர் நினைத்துக் கொண்டாரா என்று தெரியவில்லை.

ஏனென்றால், இலங்கை இராணுவம் நடத்தும் பாதுகாப்புக் கருத்தரங்கிற்கும், இலங்கைக்கு அளிக்கப்படும் வெளிநாட்டு இராணுவ உதவிகளுக்கும் எந்தத் தொடர்பும் இல்லை.

சீன – இலங்கை உறவுகள் குறித்து இந்தியா அஞ்சவில்லை என்று கூறும் சுப்பிரமணியன் சுவாமி, இலங்கைக்கு சீனா என்ன உதவிகளை வழங்கப் போகிறது என்று எதற்காக கண்காணிக்க வேண்டும்?

அதுமட்டுமன்றி, இலங்கையின் உள்நாட்டு விவகாரத்தில் தலையிடும் அதிகாரம் எவருக்கும் இல்லை என்று பலமுறை கூறிவிட்ட சுப்பிரமணியன் சுவாமியே, பண்டாரநாயக்க மாநாட்டு மண்டபத்தில், நிகழ்த்திய உரையின் போது, நோர்வேஜியர்களுக்கு இலங்கை அரசாங்கம் விசா வழங்கக் கூடாது என்று பகிரங்கமாக கூறினார்.

அது நோர்வேக்கும் இலங்கைக்கும் இடையிலுள்ள தனிப்பட்ட விவகாரம். அது இருநாடுகளினதும் வெளிவிவகாரக் கொள்கை தொடர்பான விவகாரம். அதில் மூக்கை நுழைக்கும் அதிகாரத்தை சுப்பிரமணியன் சுவாமிக்கு யார் கொடுத்தது?

இதுமட்டுமல்ல, பாதுகாப்புக் கருத்தரங்கில் சீனப் பிரதிநிதிகள் எழுப்பிய கேள்விகளுக்குப் பதிலளித்த சுப்பிரமணியன் சுவாமி, இலங்கையுடன் சீனா கொண்டுள்ள நெருக்கமான உறவு குறித்து இந்தியா கவலை கொள்ளவில்லை என்று குறிப்பிட்டிருந்தார்.

அதுவும், தன்னை இந்திய அரசின் அதிகாரபூர்வ பிரதிநிதி போலக் கருதியே அவர் அப்படிக் கூறியிருந்தார். ஆனால், சீனாவின் ஆதிக்கம் அதிகரித்து வருவது குறித்து இந்தியா கடுமையான கவலை கொண்டுள்ளது என்பதும், அதனை முறியடிப்பதற்கு கடுமையான இராஜதந்திர முயற்சிகளை மேற்கொள்கிறது என்பதும் வெளிப்படையான உண்மை.

உதாரணத்துக்கு, சீன தூதரகத்தில் பாதுகாப்பு ஆலோசகர் ஒருவர் நியமிக்கப்பட்டதை தொடர்ந்து, இந்தியாவும் கொழும்பிலுள்ள தனது தூதரகத்தில் பாதுகாப்பு அலகை விரிவுபடுத்தி புதிதாக கேர்ணல் குரிந்தர் எஸ் கிளேயர் என்ற இராணுவ புலனாய்வு அதிகாரியை பிரதி பாதுகாப்பு ஆலோசகராக நியமித்துள்ளது.

இப்படியான நிலையில், சீனாவின் தலையீடு குறித்து இந்தியா கவலை கொள்ளவில்லை என்று சுவாமி கூறியது சீனப் பிரதிநிதிகளுக்கே ஆச்சரியமான விடயமாகத்தான் இருந்திருக்கும். எனினும், சுவாமி இந்திய அரசியலில் ஒரு கோமாளியாகவே கருதப்படுபவர் என்பது சீன பாதுகாப்பு அதிகாரிகளுக்குத் தெரிந்திருக்குமா என்று தெரியவில்லை.

இவையெல்லாவற்றுக்கும் மேலாக, தமிழ்த் தேசியக் கூட்டமைப்பு முன்னரைப் போல நினைத்த மாத்திரத்தில், இந்தியப் பிரதமரைச் சந்திக்க முடியாது, இலங்கை அரசாங்கம் அனுமதி அளித்தால் மட்டும் தான்,  நரேந்திர மோடி கூட்டமைப்பைச் சந்திப்பார் என்று சுப்பிரமணியன் சுவாமி கூறி, தனக்குத்தானே மண் அள்ளிப் போட்டுக் கொண்டார்.

அவர் அவ்வாறு கூறியது கடந்த 20ம் திகதி. மறுநாள் 21ம் திகதி கூட்டமைப்பு புதுடில்லி செல்லும் அறிவிப்பு வெளியானது. அதுவும், இந்தியப் பிரதமரின் அழைப்பின் பேரில் அவர்கள் அங்கு சென்றனர்.

இந்தியப் பிரதமர், வெளிவிவகார அமைச்சர், தேசிய பாதுகாப்பு ஆலோசகர், வெளிவிவகாரச் செயலர் என்று அனைத்து உயர்மட்டத் தலைவர்கள் அதிகாரிகளும் அவர்களைச் சந்தித்துப் பேச்சு நடத்தினர்.

இதற்கு இலங்கை அரசாங்கத்தின் அனுமதி பெறப்படவில்லை. சுப்பிரமணியன் சுவாமி ஒரு கோமாளிதான் என்பதை, இலங்கை அரசாங்கமும், சிங்கள, ஆங்கில ஊடகங்களும், தெளிவாக உணர்ந்து கொள்ள கிடைத்த சந்தர்ப்பம் இது தான்.

இந்திய அரசாங்கம் என்ன செய்து கொண்டிருக்கிறது என்பதை தெரிந்து கொள்ளாமலேயே, சுவாமி வெளியிட்ட கருத்து அவருக்கே ஆப்பாக அமைந்து விட்டது. ஆனால், அதுபற்றியெல்லாம் சுவாமி அலட்டிக் கொள்ளவில்லை.

ஏனென்றால், இதுபோன்று மூக்குடைபட்டுக் கொள்வது அவருக்கு ஒன்றும் புதியதல்ல. அதேவேளை, சுப்பிரமணியன் சுவாமி இந்திய அரசியலில் என்ன பங்கை வகிக்கிறார்?

இந்திய அரசாங்கத்தில் அவரது நிலை என்ன? என்ற கேள்விக்கு இடமேதுமின்றி, அவரது தமிழர் விரோதக் கருத்துக்களை குதூகலத்துடன் வெளியிட்ட ஊடகங்கள் அனைத்துக்கும் இப்போது கூச்சம் கொள்ளும் நிலையேற்பட்டுள்ளது.

சுப்பிரமணியன் சுவாமி வெளியிட்ட கருத்துக்கள் அனைத்தையும் புறக்கணிக்க முடியாது. அதேவேளை, அவர் வெளியிடும் கருத்துக்கள் அனைத்தையும், இந்திய அரசின் நிலை என்று எடுத்துக் கொள்ளக் கூடாது.

சுவாமி தனது கருத்தையே இந்திய அரசின் நிலைப்பாடு என்பது போல வெளியிடுபவர். இந்த உண்மையை சிங்கள, ஆங்கில ஊடகங்கள் புரிந்துகொள்ளாமல் போனதால் தான், அவருக்கு அதிக முக்கியத்துவத்தைக் கொடுத்தன.

இப்போது சுவாமியின் உயரம், எடை என்னவென்பதை சிங்கள மக்களும், இலங்கை அரசாங்கமும் நன்றாகவே உணர்ந்திருக்கும்.

எனவே, இனிமேல் அவர், இலங்கைக்கு அடிக்கடி வந்து செல்வதும் சரி, ஊடகங்கள் அவருக்கு அளிக்கும் முக்கியத்துவமும் சரி குறைந்து போய் விடும்.

ஏனென்றால், அவர் தன்னை ஒரு அரசியல் கோமாளி என்பதை இலங்கை மக்களுக்கும் நிரூபித்துக் காட்டியிருக்கிறார்.

ஹரிகரன்

http://www.tamilwin.com/show-RUmsyIQVKUlp7.html

இந்தியா 100 வீதம் தமிழ் தேசியக் கூட்டமைப்புடன் இருக்கும்! மோடி, சம்பந்தன் குழுவினரிடம் கூறியவை என்ன?

[ ஞாயிற்றுக்கிழமை, 31 ஓகஸ்ட் 2014, 11:51.07 AM GMT ]

இந்தியா 100 வீதம் தமிழ் தேசியக் கூட்டமைப்புடன் இருக்கும். எனினும் கூட்டமைப்பு கொழும்பு அரசாங்கத்துடன் பேச்சு நடத்த வேண்டும் என்று இந்திய பிரதமர் நரேந்திர மோடி தெரிவித்தார். இந்தச் செய்தியை இலங்கையின் ஆங்கில நாளிதழ் இன்று வெளியிட்டுள்ளது.

கடந்த வாரத்தில் இந்தியா சென்றிருந்த தமிழ் தேசியக் கூட்டமைப்பினர் இந்தியப் பிரதமரைச் சந்தித்தனர். இதன் போது பேசப்பட்ட விடயங்களை குறித்த நாளிதழ் வெளியிட்டுள்ளது.

புதுடில்லியின் பிரசித்தமான முகவரி - இலக்கம் 7, ரேஸ்கோஸ் வீதியாகும். பாதுகாப்பு அதிகாரி ஒருவர், மூன்று வாகன தொடரணி ஒன்றை நிறுத்துகிறார். மூன்று வாகனங்களும் இந்திய பிரதமரின் வாசஸ்தலத்தில் நிறுத்தப்படுகின்றன.

இந்திய பிரதமர் நரேந்திர மோடி, தமிழ் தேசியக் கூட்டமைப்பின் தலைவர் ஆர் சம்பந்தனையும் ஏனைய நாடாளுமன்ற உறுப்பினர்களையும் கைலாகு கொடுத்து வரவேற்கிறார்.

இதன் போது நரேந்திர மோடி தமிழில் “வணக்கம்”என்று கூறி வரவேற்கிறார்.

அனைவரும் ஆசனத்தில் அமர்ந்தவுடன் மோடி, சம்பந்தனை பார்த்து ஹிந்தி மொழியில் ஏதோ கூறுகிறார். அதனை மொழிபெயர்ப்பாளர் மொழிபெயர்கிறார். “நான் உங்களின் கருத்துக்களை கேட்க விரும்புகிறேன்” என்பதே மோடி கூறிய ஹிந்தி வார்த்தையாகும்.

30 நிமிடங்களுக்கு வரையறுக்கப்பட்ட கூட்டமைப்பு, மோடி சந்திப்பு ஒரு மணித்தியாலமாக தொடர்கிறது.  இதன் போது மோடி “நாங்கள் 100 வீதம் உங்களுடன் இருக்கிறோம்” என்று கூறினார்.

இந்த வசனம் இந்திய இலங்கை உறவில் புதிய அத்தியாயத்தை எடுத்துக் காட்டியதாக ஆங்கில இதழ் குறிப்பிட்டுள்ளது

சம்பந்தன், மோடியிடம் இலங்கை தமிழர் பிரச்சினையை சுருக்கமாக கூறுகிறார்.

இராணுவ மயம், குடியேற்ற வாதம் மற்றும் வடக்கில் குடிப்பரம்பலை மாற்றும் நடவடிக்கைகள் என்று இலங்கை அரசாங்கம் மீது மூன்று குற்றச்சாட்டுக்களை அவர் மோடியிடம் முன்வைக்கிறார்.

இதனைத்தவிர ஏனைய பிரச்சினைகள் தொடர்பாகவும் அவர் மோடியிடம் எடுத்துரைக்கிறார்.

வலிகாமத்தில் இராணுவத்தின் பிரசன்னம், பொதுமக்களின் 1600 ஏக்கர் காணியை இராணுவம் கையகப்படுத்தியுள்ளமை,  இராணுவக் குடும்பங்கள் குடியேற்றப்பட்டுள்ளமை போன்ற விடயங்களை இலங்கை ஜனாதிபதியின் கவனத்துக்கு கொண்டு வந்த போதும் எவ்வித நடவடிக்கையும் எடுக்கப்படவில்லை என்று சம்பந்தன்,  மோடியிடம் முறையிடுகிறார்

நடைமுறையில் இராணுவத்தினர் குடும்பங்கள் குடியேறுவதற்காக 10 ஆயிரம் வீடுகள் அமைக்கப்படுவதாக சம்பந்தன் எடுத்துரைத்தார்.

அத்துடன் உயர் பாதுகாப்பு வலயம் என்று கூறப்படும் பிரதேசங்களில் இராணுவம் விவசாய நடவடிக்கைகளில் ஈடுபடுவதையும் அவர் சுட்டிக்காட்டினார்.

முல்லைத்தீவில் 5000 சிங்களவர்கள் வாக்களர்களாக பதிவுசெய்யப்பட்டுள்ளனர்.

இராணுவ முன்னாள் அதிகாரியை மீண்டும் ஒருமுறை வடக்கின் ஆளுநராக நியமிப்பதில்லை என்று இலங்கை ஜனாதிபதி உறுதியளித்தார்.

எனினும் அவர் மீண்டும் நியமிக்கப்பட்டுள்ளார். அவரின் ஆட்கள் வடக்கில் அரசியலில் தீவிரமாக ஈடுபட்டனர். கடந்த வடக்கு மாகாண தேர்தலின் போது அவர்கள் ஆளும் கட்சிக்காக வேலை செய்தனர்.

குறித்த ஆளுநரால் வடமாகாண முதலமைச்சர் பதவி விலகும் அளவுக்கு அழுத்தங்கள் பிரயோகிக்கப்படுகின்றன என்று சம்பந்தன் மோடியிடம் தெரிவித்தார்.

இதன்போது இந்திய பிரதமர் மோடி வடக்கின் முதலமைச்சர் விக்னேஸ்வரனை அழைக்குமாறு கூறினார். இதனை தமது அதிகாரிகளிடம் குறிப்பெடுத்துக் கொள்ளுமாறு அவர் உத்தரவிட்டார்.

இந்திய நிர்வாக முறைப்படி, மாநில முதலமைச்சர் ஒருவருக்கு வெளிநாடு ஒன்று அழைப்பு விடுக்குமானால், அவர் மத்திய அரசாங்கத்திடம் அனுமதி பெறவேண்டும். அது இலங்கைக்கும் பொருந்தும்.

இந்தநிலையில் விக்னேஸ்வரனுக்கான அழைப்பு, கொழும்பின் ஊடாக அனுப்பப்படல் வேண்டும். அந்த அழைப்பு கிடைத்ததும் விக்னேஸ்வரன் கொழும்பின் அனுமதியை பெறவேண்டும் என்று மோடி விளக்கமளித்தார்.

13வது அரசியல் அமைப்பு திருத்தம் தொடர்பில் சம்பந்தன் கூறும் போது கடந்த ஐந்து வருடங்களில் ஜனாதிபதி மஹிந்த ராஜபக்ச, இது தொடர்பில் வித்தியாசமான உறுதிமொழிகளை வழங்கினார். 13க்கு அப்பால் செல்லப் போவதாக இந்தியாவிடமும் உறுதியளித்தார்.

எனினும் அந்த உறுதிமொழிகள் கிடப்பில் போடப்பட்டன. இதன் காரணமாகவே இலங்கை அரசாங்கத்தின் நாடாளுமன்ற தெரிவுக்குழுவில் தமிழ் தேசியக் கூட்டமைப்பு பங்கேற்கவில்லை என்று சம்பந்தன் குறிப்பிட்டார்

இந்திய உதவியுடன் மேற்கொள்ளப்படும் சம்பூர் மின்சாரத் திட்டம் காரணமாக வெளியேற்றப்பட்ட மக்கள் இன்னும் இடைத்தங்கல் முகாமிலேயே தங்கியுள்ளனர். எனினும் அவர்களுக்கு அகதிகளுக்கான கொடுப்பனவுகள் நிறுத்தப்பட்டுள்ளன. கிண்ணியாவில் இந்துக்களின் கட்டுப்பாட்டில் இருந்து புனித பிரதேசம் இன்று பௌத்த ஆலயத்துக்கு கையளிக்கப்பட்டுள்ளது.

எனவே இந்த விடயத்தில் இந்தியா உரிய தலையீட்டை மேற்கொள்ள வேண்டும் என்று சம்பந்தன் கோரினார்.

இந்தநிலையில் இந்தப் பிரச்சினைகளை மேற்பார்வை செய்வதற்கென்று இந்தியா விசேட பிரதிநிதி ஒருவரை நியமிக்க வேண்டும் என்று சம்பந்தன் கோரினார்.

இதற்கு பதிலளித்த மோடி, இலங்கையில் உள்ள இந்திய உயர்ஸ்தானிகரகம் இந்த விடயத்தை கையாளும் என்று கூறினார்.

இந்திரா காந்தி பிரதமராக இருந்த போது அமைச்சரவை அந்தஸ்துடன் கோபாலசாமி பார்த்தசாரதியை விசேட பிரதிநிதியாக நியமித்தார். எனினும் அவருடைய மகன் ராஜீவ் காந்தி, இலங்கையில் இருந்த உயர்ஸ்தானிகர் ஜோடின்ராநாத் டிக்சித்தை நேரடியாக இந்த விடயத்தில் தலையிடச்செய்தார்.

இந்தநிலையில் பாரதீய ஜனதாக் கட்சியின் தலைமை, தற்போதைய இந்திய உயர்ஸ்தானிகர் வை கே சிங்ஹா இந்த விடயத்துக்கு பொருத்தமானவர் என்று நம்புகிறது. சிறந்த இராஜதந்திர அனுபவத்தை கொண்ட அவர், இந்த விடயங்களை செயற்படுத்தக் கூடியவர் என்று மோடி கூறினார்.

இலங்கை அரசாங்கம், 13வது அரசியலமைப்புக்கு அப்பால் சென்று அதனை நடைமுறைப்படுத்த இந்தியாவுக்கு உறுதி கூறியுள்ளமையை தாமும் அறிந்து கொண்டதாக மோடி குறிப்பிட்டார்.

இதற்கிடையில் தமிழ் தேசியக் கூட்டமைப்பு இலங்கையில் உள்ள தமிழ் பேசும் முஸ்லிம்கள் மற்றும் இந்திய வம்சாவளி தமிழர்களுடன் பேச்சு நடத்த வேண்டும் என்று இந்திய வெளியுறவு அமைச்சர் தம்மை சந்தித்த தமிழ் தேசியக் கூட்டமைப்பினரிடம் வலியுறுத்தியதாக கொழும்பின் ஆங்கில இதழ் சுட்டிக்காட்டியுள்ளது.

இந்தநிலையில் இலங்கையின் நாடாளுமன்ற தெரிவுக்குழு என்ற அம்சத்தை போன்ற இந்திய பிரதமர் இலங்கையின் எதிர்க்கட்சியினரையும் சந்திக்க எண்ணியிருப்பதாக ஆங்கில இதழ் குறிப்பிட்டுள்ளது.

இதில் அரசியலில் தற்போது அங்கம் வகிப்போர் உட்பட்ட மூத்த அரசியல்வாதிகளும் உள்ளடக்கப்படுவர் என்றும் ஆங்கில இதழ் தெரிவித்துள்ளது.

இதேவேளை தமிழ் தேசியக் கூட்டமைப்பினரின் இந்திய பயணத்தின் போது மற்றும் ஒரு முக்கிய விடயம் இடம்பெற்றது. ஆகஸ்ட் 21ம் திகதியன்று சம்பந்தன் குழுவினர் முன்னாள் பிரதமர் மன்மோகன் சிங்கை சந்தித்தனர். மன்மோகன் சிங்கின் தனிப்பட்ட இல்லத்தில் இந்த சந்திப்பு இடம்பெற்றது.

இதன்போது மஹிந்த ராஜபக்ச 13வது அரசியலமைப்பு குறித்து இந்தியாவுக்கு வழங்கிய உறுதிமொழிகளை புதிய இந்திய பிரதமருக்கு தெரிவிக்க வேண்டும் என்று சம்பந்தன், மன்மோகன் சிங்கிடம் கேட்டுக்கொண்டார்.

இதற்கு பதிலளித்த மன்மோகன் சிங், தாம் ஏற்கனவே, தாம் இது தொடர்பில் மோடியிடம் தெரிவித்துள்ளதாக கூறினார்.

தற்போது நீங்கள் கேட்பதால், மீண்டு;ம் மோடியை சந்திக்கும் போது அவரிடம் அதனைக் கூறுகிறேன் என்று மன்மோகன் சிங் உறுதியளித்தார்.

இதேவேளை சம்பந்தன் குழுவினர் தமிழகத்தில் பாரதீய ஜனதாக் கட்சியை சந்தித்தமையை கொண்டு பாரதீய ஜனதாக் கட்சி. அரசியல் நிலைப்பாட்டை எடுக்கத் துணியலாம் என்று கொழும்பின் ஆங்கில இதழ் குறிப்பிட்டுள்ளது.

கடந்த பொதுத்தேர்தலில் பாரதீய ஜனதாக்கட்சி பாரிய வெற்றியை பெற்ற போதும் தமிழகத்தில் அண்ணா திராவிட முன்னேற்றக் கழகம் பாரிய வெற்றியை தக்கவைத்துக் கொண்டது.

இந்தநிலையில் 2016ம் ஆண்டு நடைபெறவுள்ள தமிழக் சட்டசபை தேர்தலை இலக்காகக் கொண்டே பாரதீய ஜனதாக் கட்சியின் தமிழக கிளை தமிழ் தேசியக் கூட்டமைப்பினருடனான சந்திப்பை நடத்தியதாக கொழும்பின் ஆங்கில இதழ் எதிர்வு கூறியுள்ளது.

http://www.tamilwin.com/show-RUmsyIQVKUlqy.html