மேர்வின் சில்வா வெளியிடும் தகவல்களால் மகிந்த குழப்பத்தில்

உகண்டா அரசாங்கத்தின் விருப்பமின்றி அந்நாட்டுக்கு நிதியை ஒதுக்கிய மஹிந்த

[ புதன்கிழமை, 08 ஏப்ரல் 2015, 03:18.45 AM GMT ]

உகண்டா அரசாங்கம் ஏற்காதநிலையில் அந்த நாட்டின் அபிவிருத்தி திட்டம் ஒன்றுக்கு இலங்கையின் முன்னாள் அரசாங்கம் 170 மில்லியன் ரூபாய்களை ஒதுக்கியிருந்தாக தெரிவிக்கப்பட்டுள்ளது.

பொருளாதாரத்துறை பிரதியமைச்சர் ஹர்ச டி சில்வா இதனை நேற்று நாடாளுமன்றத்தில் தெரிவித்துள்ளார்.

குறித்த அபிவிருத்தி திட்டத்துக்கு என்ன நடந்தது என்று தெரியாது. எனினும் ஒப்பந்தக்காரருக்கு 94000 அமெரிக்க டொலர்கள் செலுத்தப்பட்டுள்ளதாக பிரதியமைச்சர் குறிப்பிட்டுள்ளார்.

தொழில்துறை பயிற்சி நிலையம் ஒன்றை அமைப்பதற்காகவே இந்த நிதியொதுக்கீடு செய்யப்பட்டது. எனினும் அதனை உகண்டாவின் அரசாங்கம் நிராகரித்துவிட்டது.

இதனையடுத்து இரண்டு கட்டிடங்களை கட்டித்தர இலங்கை அரசாங்கம் முன்வந்தபோதும் அதனையும் உகண்டா அரசாங்கம் நிராகரித்துவிட்டது.

இதன்பின்னரும் பெண்களுக்கான விடுதி ஒன்றை நிர்மாணிப்பதற்கு இலங்கை அரசாங்கம் யோசனையை முன்வைத்தது. அதனையும் உகண்டா அரசாங்கம் நிராகரித்தது.

இந்தநிலையில் அந்த நிதிக்கு என்ன நடந்தது என்று தெரியவில்லை என்று ஹர்சா டி சில்வா தெரிவித்துள்ளார்.

http://www.tamilwin.com/show-RUmtyETcSUkt2C.html

மேர்வின் சில்வா வெளியிடும் தகவல்களால் மகிந்த குழப்பத்தில்

[ புதன்கிழமை, 08 ஏப்ரல் 2015, 05:48.25 AM GMT ]

முன்னாள் ஜனாதிபதி மகிந்த ராஜபக்ச குடும்பத்தினருடன் மிகவும் நெருக்கமாக இருந்த முன்னாள் அமைச்சர் மேர்வின் சில்வா, தற்போது ராஜபக்ச குடும்பத்தினர் தொடர்பாக வெளியிட்டு வரும் தகவல்களால், மகிந்த ராஜபக்ச உட்பட முக்கிய நபர்கள் பெரும் குழப்பத்தில் இருந்து வருவதாக தெரியவருகிறது.

தனியார் தொலைக்காட்சி ஒன்றுக்கு அண்மையில் வழங்கி பேட்டி ஒன்றில் கருத்து வெளியிட்ட மேர்வின் சில்வா, ராஜபக்சவினர் செய்யுமாறு கூறிய வேலைகளையே தாம் செய்ததாகவும் பின் அவர்கள் செய்நன்றி மறந்து போயினர் என்றும் கூறியிருந்தார்.

அத்துடன் வெள்ளை வான் சம்பவங்களின் பின்னனியில் முன்னாள் பாதுகாப்புச் செயலாளர் கோத்தபாய ராஜபக்ச இருப்பதாகவும் அவர் வெள்ளை வான் கலாச்சாரத்தின் பிதாமகன் எனவும் மேர்வின் சில்வா குறிப்பிட்டிருந்தார்.

தன்னிடம் இதற்கான சாட்சியங்கள் இருப்பதாகவும், கோத்தபாய ராஜபக்ச உருவாக்கியுள்ள கொலை செய்யும் குழுக்கள் இன்னும் சுதந்திரமாக நடமாடுவதாகவும் இந்த தகவல்களை வெளியிடுவதால், தனது உயிருக்கும் ஆபத்து ஏற்படும் எனவும் அவர் தெரிவித்திருந்தார்.

கம்பஹா தெல்கொட பிரதேசத்தில் உள்ள விகாரை ஒன்றில் நடைபெற்ற வைபவம் ஒன்றில் உரையாற்றிய மகிந்த ராஜபக்ச, தான் உட்காரும் போது உட்கார அஞ்சியவர்களும் தன் காலடியில் அமர்ந்தவர்களும் தற்போது தன்னை பற்றி பல கதைகளை கூறி வருவதாக குறிப்பிட்டுள்ளார்.

தற்போது நாட்டில் பலர் அதிகாரங்களை தன்வசம் எடுத்து கொண்டு செயற்பட்டு வருவதாக கூறி மகிந்த முன்னாள் ஜனாதிபதி சந்திரிக்கா பண்டாரநாயக்கவையும் விமர்சித்துள்ளார்.

தன்னை அரசியலுக்கு வர வேண்டும் எனக் கூறுபவர்கள் அரசியலுக்கு வந்து செயற்படுவதாகவும் அவர்கள் செல்வந்தர்கள் என்பதால், அரசியலுக்கு வர முடிந்திருக்கலாம் எனவும் மகிந்த சந்திரிக்காவை பற்றி குறிப்பிட்டுள்ளார்.

மக்கள் ஒருவருக்கு வாக்களித்த போதிலும் நிறைவேற்று சபையில் இருந்து கொண்டு பலர் உத்தரவுகளை பிறப்பித்து வருகின்றனர் எனவும் அவர் மேலும் கூறியுள்ளார்.

http://www.tamilwin.com/show-RUmtyETcSUkt2H.html