கிழக்கு மாகாண சபையில் பிரச்சினை! முதலமைச்சருடன் கேரளா செல்ல மறுத்த மாகாண அமைச்சா்கள்!

ஓய்வூதிய விவசாயிகளின் வயிற்றிலடிக்கும் நிதி அமைச்சு

[ திங்கட்கிழமை, 03 யூன் 2013, 02:35.21 AM GMT ]

இலங்கையில் விவசாயிகளுக்குரிய ஒய்வூதியம் சுமார் ஒன்றரை ஆண்டுகளாக இடைநிறுத்தப்பட்டுள்ளதால் அவர்களில் பலரும் பொருளாதார ரீதியில் பெரிதும் பாதிக்கப்பட்டுள்ளதாக அறிய முடிகின்றது.

விவசாய காப்புறுதி சபையின் ஊடாக இலங்கையில் விவசாயிகளுக்கான ஒய்வூதியத் திட்டம் நடைமுறையில் உள்ளது.

விவசாய காப்புறுதி சபை அதிகாரிகள் மற்றும் விவசாயிகளின் தகவல்களின் விவசாயிகளுக்கான ஓய்வூதிய கொடுப்பனவு 17 மாதங்களாக நிறுத்தப்பட்டுள்ளதாக அறியமுடிகின்றது.

பாதிக்கப்பட்டுள்ள விவசாயிகள் தங்களின் இந்தப் பிரச்சினைக்கு தீர்வொன்றைப் பெற்றுத்தருமாறு அமைச்சர்கள் தொடக்கம் மனித உரிமை அமைப்புகள் என பலரையும் சந்தித்து தொடர்ந்தும் மனுக்களை கையளித்தும் முறையீடுகளை செய்தும் வருகின்றனர்.

சம்மாந்துறை பிரதேசத்தை 64 வயதான ஆதம்பாவா அஸீஸ் 60 வயதின் பின்னர் ஒய்வூதியம் கிடைக்கும் என்ற நம்பிக்கையில் 20 வருடங்களுக்கு மேலாக இதற்கான கட்டணத்தை செலுத்தி வந்ததாக கூறுகின்றார்.

விவசாயிகளுக்கு ரூபாய் 1050 தொடக்கம் 1300 வரையில் ஒய்வூதியம் வழங்கப்பட்டு வந்ததாகவும் தற்போது எந்தவிதமான காரணமும் கூறப்படாமல் முன்னறிவிப்பும் இன்றி அது நிறுத்தப்பட்டுள்ளதாகவும் அவர் கவலையுடன் தெரிவிக்கின்றார்.

விவசாயியான 61 வயதான முகமட் ஹனி முகமட் ஹுசைன் விவசாய துறையினரால் விடுக்கப்பட்ட அறிவித்தலின் பேரில் இத்திட்டத்தில் இணைந்து வருடமொன்றுக்கு இரு தடவைகள் தவணைப் பணம் செலுத்தி வந்தாகவும் மாதந்தம் ரூபா 1140 ஒய்வூதிய கொடுப்பனவை தான் அஞ்சல் அலுவலகங்களில் பெற்று வந்ததாகவும் தெரிவிக்கின்றார்.

தமது ஒய்வூதிய கொடுப்பனவு நிறுத்தப்பட்டுள்ளமை தொடர்பாக உரிய அதிகாரிகளிடம் கேட்டால் ஜனாதிபதிதான் நிதி அமைச்சர், அங்கிருந்துதான் நிதி வரவேண்டும் என பதில் தரப்படுகின்றது என்றும் அவர் குறிப்பிடுகின்றார்.

மற்றுமோர் விவசாயி, 72 வயதான மொகதீன்பாவா அஹமது லெப்பை விவசாயிகள் நாட்டின் முதுகெலும்பு என்பார்கள். ஆனால் வயோதிபமடைந்துள்ள விவசாயிகள் ஒய்வூதியத்தில் இணைந்தும் இப்போ பிச்சை எடுக்கும் நிலையிலே உள்ளனர் என்றும் இந்தப் பிரச்சினையை அமைச்சர்கள் பலரிடம் தெரிவித்தும் பயன் இல்லை என்றும் கூறுகிறார்.

இந்தப் பிரச்சினை குறித்து விவசாய காப்புறுதி சபையுடன் தொடர்பு கொண்ட போதிலும் அதிகாரபூர்வமாக பதிலளிக்க கூடியவர்களின் தொடர்புகளை பெற முடியவில்லை.

இந்த ஓய்வூதியம் வழங்கப்படுவது நாடெங்கிலும் இடைநிறுத்தப்பட்டுள்ளது. நிதி அமைச்சுத்தான் இது தொடர்பான முடிவு எடுக்க வேண்டும் என தமது பெயர் குறிப்பிட விரும்பாத அதிகாரிகளின் பதில்களிலிருந்து அறிய முடிந்தது.

http://www.tamilwin.com/show-RUmryGTXNcls0.html

கிழக்கு மாகாண சபையில் பிரச்சினை! முதலமைச்சருடன் கேரளா செல்ல மறுத்த மாகாண அமைச்சா்கள்!

[ திங்கட்கிழமை, 03 யூன் 2013, 02:48.17 AM GMT ]

கிழக்கு மாகாண முதலமைச்சரையும், மாகாண ஆளுனரையும் மாற்றுமாறு, கிழக்கு மாகாணத்தின் ஆளும் தரப்பு உறுப்பினர்கள் 20 பேர் வலியுறுத்தி வருவதாக தெரிவிக்கப்படுகிறது.

ஆங்கில ஊடகம் ஒன்று இந்த செய்தியை வெளியிட்டுள்ளது.

கிழக்கு மாகாண முதலமைச்சரும், ஆளுனரும் தங்களின் வேலைத்திட்டங்களை முறையாக அமுல் படுத்த இடையூறாக இருப்பதாக அவர்கள் தெரிவித்து வருகின்றனர்.

இதனால் அவர்களை மாற்றும் வரையில் வடக்கு மாகாண சபைத் தேர்தலை நடத்த கூடாது என்றும் அதுவரையில் மாகாணசபையின் அமர்வுகளில் பங்கேற்கப் போவதில்லை என்றும் குறித்த 20 உறுப்பினர்களும் எச்சரித்துள்ளனர்.

2ம் இணைப்பு

கிழக்கு மாகாண முதலமைச்சருடன் கேரளா செல்ல மறுத்த அமைச்சர்கள்

கிழக்கு மாகாண முதலமைச்சர் நஜீப் ஏ மஜீத் தலைமையில் இந்தியாவின் கேரள மாநிலத்திற்கான விஜயத்தை மாகாண அமைச்சர்கள் நான்குபேர் பகிஷ்கரித்துள்ளனர்.

கேரள மாநில முதலமைச்சரின் அழைப்பை ஏற்று கிழக்கு மாகாணசபை முதலமைச்சர் நஜீப் ஏ மஜீத் தலைமையில் மாகாணசபை உறுப்பினர்கள் அடங்கிய குழுவொன்று நேற்று இரவு அங்கு பயணமாகவிருந்தது.

எதிர்வரும் 7ம் திகதிவரை கேரளாவில் தங்கி இருப்பதற்கும் ஏற்பாடு செய்யப்படிருந்தது.

ஆனால் இந்த விஜயத்தினை கிழக்கு மாகாணசபை அமைச்சர்களான விமலவீர திஸாநாயக்க, எம்.ஐ.எம்.மன்சூர், எம்,எஸ்.உதுமா லெப்பை, காபிஸ் நஸீர் அகமட் ஆகியோர் பகிஷ்கரித்துள்ளனர்.

தமது முடிவு குறித்து முதலமைச்சருக்கு எழுத்து மூலம் இவர்கள் அறிவித்துள்ளனர்.

முதலமைச்சர் நஜீப் ஏ மஜீத்தின் செயற்பாடுகளுக்கு எதிர்ப்புத் தெரிவித்தும், ஆளுநரின் தலையீடுகளை கண்டித்துமே அமைச்சர்கள் நால்வரும் இந்த முடிவினை எடுத்துள்ளதாக தெரிவிக்கப்படுகின்றது.

கடந்த வாரம் முதலமைச்சர் தலைமையில் நடைபெற்ற மாகாண அமைச்சரவைக் கூட்டத்தையும் மூன்று அமைச்சர்கள் புறக்கணித்திருந்தனர்.

இதன் தொடர்ச்சியாகவே கேரள மாநிலத்திற்கான விஜயத்திலும் நான்கு அமைச்‌சர்களும் பங்கேற்கவில்லையெனத் தெரிகின்றது.

http://www.tamilwin.com/show-RUmryGTXNcls2.html