போதிய வசதியிருந்தும் மக்களுக்கு பயன்படாத பண்டத்தரிப்பு பிரதேச வைத்தியசாலை: மக்கள் அவதி (செய்தி ஆய்வு)!

அவுஸ்திரேலிய புதிய பிரதமரானார் மீண்டும் கெவின் ரூட்: வாக்கெடுப்பில் கிலலார்ட் தோல்வி

[ புதன்கிழமை, 26 யூன் 2013, 10:42.42 AM GMT ]

அவுஸ்திரேலியாவில் புதிய பிரதமருக்காக நடந்த வாக்கெடுப்பில் கெவி்ன் ரூட்டிற்கு ஆதரவாக அதிக வாக்குகள் கிடைத்ததால் ‌மீண்டும் பிரதமராக கெவின் ரூட் தெரிவு‌ செய்யப்பட்டார். கில்லார்ட் பதவி விலகுவதாக அறிவித்தார்.

அவுஸ்திரேலியாவில் தொழிலாளர் கட்சி தலைமையிலான கூட்டணி ஆட்சி நடக்கிறது. பிரதமராக ஜூலியா கில்லார்ட் பதவி வகித்து வந்தார்.

இவர் கடந்த 2010-ம் ஆண்டு பிரதமராக இதே தொழிலாளர் கட்சியின் மூத்த தலைவரான கெவின் ரூட் பதவி விலகியதை அடுத்து, ஜூலியா கில்லார்ட் பிரதமராக பொறுப்பேற்றார்.

அவுஸ்திரேலியாவில் சமீப காலமாக தொழிலாளர் கட்சிக்கு மக்களிடம் செல்வாக்கு சரிந்து வருவதாக கூறப்படுகிறது. இதனால் கில்லார்ட் தலைமையிலான ஆட்சிக்கு நெருக்கடி ஏற்படும் சூழ்நிலை இருந்தது.

இதையடுத்து பிரதமரை மாற்றுவதற்காக பாராளுமன்றத்தில் கூட்டம் நடந்தது.  அங்கு நடந்த விவாதத்தில் 72 எம்.பி.க்களை கொண்ட முக்கிய எதிர்க்கட்சித் தலைவரான டோனி அபோட் கூறுகையில்,

புதிய அரசு அமையுங்கள் இல்லையெனில் பொதுத்தேர்தலை அறிவியுங்கள் என்றார்.

இதையடுத்து மக்கள் பிரதிநித்துவ ச‌பையில் வாக்கெடுப்பு நடத்தப்பட்டது. இதில் முன்னாள் பிரதமரான கெவின் ரூட்டிற்கு ஆதரவாக 57 வாக்குகளும், கில்லார்ட்டுக்கு ஆதரவாக 45 வாக்குகளும் கிடைத்தன.

அவுஸ்திரேலிய பாராளுமன்றில் மொத்தம் ‌150 எம்.பி.க்கள் உள்ளனர். இதில் தொழிலாளர் கட்சிக்கு (லேபர் கட்சி ) 71 எம்.பி.க்கள் தான் உள்ளனர். மெஜாரிட்டிக்கு 76 எம்.பி..க்கள் தேவை என்பதால் கூட்டணி கட்சிகளின் ஆதரவுடன் கில்லார்ட் பிரதமராக பதவி வகித்து வந்தார்.

இந்நிலையில் புதிய பிரதமருக்காக நடந்த வாக்கெடுப்பில் கெவி்ன்ரூட்டிற்கு ஆதரவாக அதிகமான வாக்குகள் கிடைத்ததால் ‌மீண்டும் பிரதமராக கெவின் ரூட் தேர்வு‌ செய்யப்பட்டார். கில்லார்ட் பதவி விலகுவதாக அறிவித்தார்.

புதிய பிரதமராக பொறுப்பேற்க உள்ள கெவின் ரூட் (57)  கூறுகையி்ல், அவுஸ்திரேலியாவில் ஆகஸ்ட் அல்லது செப்டம்பரில் தேர்தல் நடைபெறும் என்றார்.

http://www.tamilwin.net/show-RUmryGRaNdloy.html

போதிய வசதியிருந்தும் மக்களுக்கு பயன்படாத பண்டத்தரிப்பு பிரதேச வைத்தியசாலை: மக்கள் அவதி (செய்தி ஆய்வு)

[ புதன்கிழமை, 26 யூன் 2013, 10:32.16 AM GMT ]

வைத்தியசாலைக்குரிய போதியளவான கட்ட வசதிகளுடன் உள்ள பண்டத்தரிப்பு பிரதேச வைத்தியசாலையில் வைத்திய சேவைகள் சீராக நடைபெறாமையினால் பொதுமக்கள் வேறு வைத்தியசாலையை நாடிச் செல்லும் அவலநிலை தொடர்கின்றது.

யாழ்.குடாநாட்டில் பல கிராமங்களில் உள்ள பொதுமக்கள் மருத்துவ வசதிகள் நிறைவாகக் கிடைக்காமல் பெரும் சிரமங்களை எதிர்கொண்டு வருகின்றார்கள். இதனால் யாழ்.போதனா வைத்தியசாலைக்கு தினமும் பெருமளவான நோயாளர்கள் படையெடுத்துச் செல்கின்றனர்.

சாதாரண இருமல், காய்ச்சல் முதல் குழந்தைப்பேறு வரை அனைத்துக்குமே குடாநாட்டு மக்கள் நாடிச் செல்லும் ஒரே வைத்தியசாலையாக யாழ். போதனா வைத்தியசாலைதான் உள்ளது. இதனால் அதிகரித்துச் செல்லும் நோயாளர்களினால் அவ்வைத்தியசாலையில் இடப்பற்றாக்குறையும் அடிக்கடி ஏற்படுகின்றது.

பெருமளவான நோயாளர்கள் நடைபாதைகளில் படுத்துறங்குகிறார்கள். குறிப்பிட்ட நேரத்திற்குள் அனைவரையும் கவனிக்க வேண்டியிருப்பதால் வைத்திய சேவைகளும் அனைவருக்கும் நிறைவாகக் கிடைப்பதுமில்லை.

ஒரு மாவட்டத்திலுள்ள அனைத்து நோயாளர்களும் ஒரு வைத்தியசாலையை நாடிச் செல்வதினால் அங்கு அனைத்துத் தரப்பினருக்கும் பல அசௌகரியங்கள் ஏற்பட்டு வருகின்றது. இவ்வாறான பிரச்சினைகள் ஏற்படாமல் இருப்பதற்காகவே அரசாங்கம் பிரதேச ரீதியாக அரசினர் மற்றும் பிரதேச வைத்தியசாலைகளை நிறுவியுள்ளது. மக்களின் அவசர மருத்துவ தேவைகளை உடனே தீர்த்துக்கொள்வதற்காக இவ்வாறான வைத்தியசாலைகளை அத்தியவசிய வசதிகளுடன் அமைத்துள்ளது.

இவ்வாறு யாழ்.குடாநாட்டில் தற்போது 23 பிரதேச வைத்தியசாலைகளும் 4 ஆதார வைத்தியசாலைகளும் மற்றும் 13 ஆரம்ப சுகாதார பராமரிப்பு நிலையங்களும் உள்ளன. குறைந்த பட்சமாக 5 கிராமங்களை உள்ளடக்கிய பொதுமக்களின் உடனடி மருத்துவ தேவைகளை நிறைவேற்றக்கூடியதாக இவைகள் காணப்படுகின்றன.

இவ்வாறே வலிகாமம் தென்மேற்குப் பிரதேசத்தில் பிரதேச வைத்தியசாலைக்குரிய அனைத்து வசதிகளுடனும் பண்டத்தரிப்பு பிரதேச வைத்தியசாலை உள்ளது.

வெளிநோயாளர் பிரிவு, நோயாளர் தங்குமிடம், கர்ப்பிணித் தாய்மார்களுக்கான தங்குமிடம், பிரசவ அறை மற்றும் பிரேத அறை என்பன முழுமையாகக் கட்டிக்கொடுக்கப்பட்டுள்ளன. அத்துடன் மருத்துவர்கள் தங்குவதற்கான தங்குமிடமும் சகல வசதிகளுடனும் இங்கு உள்ளதைக் காணக்கூடியதாகவுள்ளது.

இவ்வைத்தியசாலையை அண்மித்துள்ள பண்டத்தரிப்பு, சில்லாலை, மாதகல், இளவாலை, விளான் போன்ற பிரதேசங்களில் வாழும் மக்கள் இதன் முலம் நிறைவான மருத்துவ வசதியைப் பெற்றுக்கொள்ள முடியும். ஆனால் இவ்வைத்தியசாலை தற்போது முழுமையாக இயங்கிக் கொள்வதில்லை.

பெரும் செலவில் கட்டப்பட்ட வைத்தியசாலை விடுதிகளும் பிரசவ அறையும் நீண்டகாலமாக கைவிடப்பட்ட நிலையில் உள்ளன. கட்டில்களும் மெத்தைகளும் பாவிக்கப்படாமல் கைவிடப்பட்டு உள்ளதை அவதானிக்க முடிகின்றது.

இவ்வைத்தியசாலையில் வெளிநோயாளர் பிரிவு மாத்திரம் தினமும் வழமை போல இயங்கி வருகின்றது. அதிலும் அதிகமான நோயாளர்களுக்கு யாழ். போதனா வைத்தியசாலைக்கோ அல்லது யாழ். பண்ணை வைத்தியசாலைக்கோ, சங்கானை அரசினர் வைத்தியசாலைக்கோ செல்வதற்கான உபதேசங்கள் தான் வழங்கப்பட்டு வருகின்றன. சிறிய நோய்களுக்காக செல்பவர்களும் மருத்துகளை வாங்குவதற்காக தனியார் பார்மஸிகளுக்கே அனுப்பப்பட்டு வருகின்றனர்.

தற்போது இவ்வைத்தியசாலையில் ஒரு பெண் வைத்தியர் மாத்திரமே கடமையாற்றி வருகின்றார். அவருடன் ஒரு மருத்துவமாதுவும் ஒரு மருத்துக்கலவையாளரும் மற்றும் சிற்றூழியர்களும் கடமையில் உள்ளனர். வைத்தியசாலைக்கென ஒரு அம்புலன்ஸ் வாகனமும் உள்ளது.

இப்பிரதேசத்திலுள்ள மக்களில் அதிகமானோர் இவ்வைத்தியசாலையைச் சென்று நேரத்தை வீணடிக்காமல் நேராகவே யாழ்.போதனா வைத்தியசாலைக்குச் சென்றுவிடுகின்றனர். கர்ப்பிணித் தாய்மார்களையும்; அதிக பணச் செலவுடன் முச்சக்கர வண்டிகளிலோ அல்லது வேறு வாகனங்களிலோ யாழ். போதனா வைத்தியசாலைக்கே கொண்டு செல்கின்றனர்.

இவ்வாறு யாழ்.குடாநாட்டிலுள்ள ஒவ்வொரு பிரதேசங்களிலிருந்தும் நோயாளிகள் யாழ். போதனா வைத்தியசாலைக்கு படையெடுத்துச் செல்வதால் அங்கு தினமும் சனநெருசல் ஏற்பட்டு வருகின்றது.

சகல வதிகளுடனும் உள்ள இவ்வைத்தியசாலை முறையாக இயங்குமாக இருந்தால் இப்பகுதியில் வாழும் பொதுமக்கள் அனைவரும் நிறைவான மருத்துவ வசதியைப் பெற்றுக்கொள்வார்கள்.

1992 ஆம் ஆண்டு நடைபெற்ற முன்னேறிப் பாய்ச்சல் இராணுவ நடவடிக்கையால் இப்பகுதி மக்கள் இடம்பெயர்வதற்கு முன்னர் இவ்வைத்தியசாலை இரண்டு கட்டடங்களுடனும் சொற்ப வசதிகளுடனும் மக்களுக்கு சிறந்த சேவையை வழங்கி வந்துள்ளது. நோயாளர் தங்குமிடம், பிரசவ பிரிவு என்பன இரவு பகலாக இயங்கி வந்தன.

மருத்துவர்களும் தாதியர்கள் மற்றும் ஊழியர்களும் நிறைவாக இருந்து சேவையாற்றியுள்ளனர் என பிரதேச மக்கள் தெரிவிக்கின்றனர். தற்போது அதிக கட்டங்களுடனும் சகல வசதிகளுடனும் இவ்வைத்தியசாலை உள்ளபோதும் இப்பகுதி மக்களுக்கான வைத்திய சேவை நிறைவாகக் கிடைப்பதில்லை அவர்கள் கவலை தெரிவிக்கின்றனர்.

இப்பிரதேசத்தில் இவ்வாறனதொரு ஒரு வைத்தியசாலை இருப்பதையே மக்கள் மறந்துவிட்டார்கள். பலருக்கு இவ்வைத்தியசாலை அமைத்திருக்கும் இடம் கூடத் தெரியாது. நிறைவான இடவசதிகளைக் கொண்டுள்ள பண்டத்தரிப்பு பிரதேச வைத்தியசாலைக்கு வடமாகாண மற்றும் மாவட்ட சுகாதாரத் திணைக்களங்கள் மேலதிகமாக வைத்தியர் ஒருவரை நியமித்து ஆளணிகளை அதிகரித்தும் அதன் செயற்பாட்டை விருத்தி செய்ய வேண்டும்.

வைத்தியசாலையை அண்மித்து வாழும் மக்கள் அனைவரும் பயன்பெறும் வகையில் மருத்துகளும் இங்கு கிடைப்பதற்கு வசதிகளைச் செய்ய வேண்டும். இதன் முலம் இப்பகுதியில் வாழும் மக்களுக்கு இவ்வைத்தியசாலை மீது நம்பிக்கையை ஏற்படுத்த வேண்டும்.

யாழ். போதனா வைத்தியசாலை தினத்தோறும் எதிர்நோக்கிவரும் இடப் பற்றாக்குறை, அதிக நோயாளர் வருகை போன்றவற்றைக் குறைத்துக் கொள்வதற்கு இவ்வாறான பிரதேச வைத்தியசாலைகளை சிறப்பாக இயங்க வைத்து அவற்றைக் கண்காணித்து வருவதன் முலமே தீர்த்துக் கொள்ள முடியும். இதற்கு யாழ் போதனா வைத்தியசாலையின் பணிப்பாளரும் மாகாண, மாவட்ட சுகாதாரத் திணைக்களங்களும் கலந்தாலோசித்து ஒர் தீர்வினைக் காண வேண்டும்.

பொதுமக்களின் தேவைகளைப் பூர்த்தி செய்வதற்காக கட்டப்பட்ட கட்டடங்களும் வளங்களும் எவருக்குமே பயனின்றி பூமிக்குப் பாரமாக உள்ளன.

http://www.tamilwin.net/show-RUmryGRaNdmx7.html