ராஜரட்ட பல்கலைக்கழகத்துடன் திருமலை வளாக நிர்வாகத்தை இணைக்க முயற்சி: புத்திஜீவிகள் கண்டிப்பு!

சுவிஸில் இடம்பெற்ற மாவீரர்களின் நினைவுகள் சுமந்த மாபெரும் உதைப்பந்தாட்டப் போட்டி

[ வெள்ளிக்கிழமை, 19 யூலை 2013, 01:14.02 PM GMT ]

சுவிட்சர்லாந்து சூரிச் வின்ரத்தூர் நகரில், இளம்றோயல் விளையாட்டுக் கழகம் நடாத்திய மூத்த தாக்குதல் தளபதி லெப். சீலன், வீரவேங்கை ஆனந்த், மூத்த உறுப்பினர் லெப். செல்லக்கிளி அம்மான் ஆகியோரின் 30வது ஆண்டு நினைவுகள் சுமந்த மாபெரும் உதைபந்தாட்டச் சுற்றுப் போட்டி கடந்த ஞாயிற்றுக்கிழமை மிகவும் சிறப்பாக நடைப்பெற்றது.

இம் மூன்று மாவீரர்களின் திருவுருவப்படங்களுடன், இன உணர்வாளர், தமிழ் திரைப்பட இயக்குனர் மணிவண்ணன் மற்றும் 29.06.2013. அன்று ஸ்பானியாவில் அகால மரணமடைந்த ஜேர்மனி துத்ட்ளின்கேன் விளையாட்டு வீரன் பிரகாஷ் ஆகியோரினது திருவுருவப்படங்களும் வைக்கப்பட்டு ஆரம்ப நிகழ்வு ஆரம்பமானது.

பொதுச்சுடர், ஈகைச்சுடர்கள் ஏற்றப்பட்டு, மலர் வணக்கம், அகவணக்கம் செலுத்தப்பட்ட பின்னர் போட்டிகள் ஆரம்பமானது. இவ் உதைப்பந்தாட்டப் போட்டியில் 12 அணிகள் கலந்து கொண்டன.

இப் போட்டியில் முதலாவது இடத்தை வெற்றியிட்டிய லுர்சன் யங்க்பட்ஸ் உதைபந்தாட்டக் கழகத்துக்கு மூதூர் தளபதி மேஜர் கணேஸ் அவர்களின் நினைவு வெற்றிக் கிண்ணமும், இரண்டாது இடத்தை வெற்றியிட்டிய சுக் தாய் மண் விளையாட்டுக் கழகத்துக்கு மூத்த உறுப்பினர் கப்டன் லாரா ரஞ்சன் அவர்களின் நினைவு வெற்றிக் கிண்ணமும், மூன்றாவது இடத்தை வெற்றியிட்டிய லிஸ் யங்க்ஸ்ரார் விளையாட்டுக் கழகத்துக்கு மட்டகளப்பு தாக்குதல் தளபதி லெப். பரமதேவா அவர்களின் நினைவு வெற்றிக் கிண்ணமும் வழங்கப்பட்டன.

மேலும், சிறந்த கழகத்திக்காக மூத்த உறுப்பினர் லெப். செல்லக்கிளி அம்மான் நினைவு வெற்றிக் கிண்ணம் பேர்ன் றோயல் விளையாட்டுக்கழகத்திக்கும், சிறந்த விளையாட்டு வீரராக தெரிவு செய்யப்பட்ட சுக் தாய் மண் விளையாட்டுக் கழக வீரர் (சீருடை இலக்கம் 9) கயா அவர்களுக்கு யாழ் மாவட்ட சிறப்புத் தளபதி லெப் கேணல் மதி அவர்களின் நினைவுக் கிண்ணமும், சிறந்த பந்து காப்பாளராக தெரிவு செய்யப்பட்ட லுர்சன் யங்க்பட்ஸ் உதைப்பந்தாட்டக் கழக வீரர் (சீருடை இலக்கம் 1) அகிந்தன் அவர்களுக்கு லெப் கேணல் சரா நினைவுக் கிண்ணமும், இறுதிப் போட்டியின் சிறந்த வீரராகத் தெரிவு செய்யப்பட்ட லுர்சன் யங்க்பட்ஸ் உதைப் பந்தாட்டக் கழக வீரர் (சீருடை இலக்கம் 28 வென்னிலனுக்கு லெப். கேணல் ராஜன் நினைவுக் கிண்ணமும், முதலாம் இடத்தை வெற்றி கொண்ட லுர்சன் யங்க்பட்ஸ் உதைப் பந்தாட்டக் கழகத்திக்கு மூத்த தாக்குதல் தளபதி லெப் சீலன், வீரவேங்கை ஆனந்த் நினைவுச் சுற்றுக்கிண்ணமும் அத்தோடு இப்போட்டியில் பங்கு பற்றிய கழகங்களுக்கு நினைவுக் கேடையங்களும் வழங்கி கௌரவிக்கப்பட்டனர்.

இந்நிகழ்வின் போது வீரச்சாவடைந்த இம் மாவீரர்களின் சாதனைகளையும், அவர்கள் வீரச்சாவடைந்த தாக்குதல் நிகழ்வுகள் பற்றி மிகவும் விபரமான முறையில் எடுத்துரைக்கப்பட்டு வெற்றிக் கிண்ணங்கள் வழங்கப்பட்டன.

அத்தோடு இச்சுற்றுப்போட்டிக்கு அனுசரணை வழங்கிய அனைத்து வர்த்தக நிறுவனங்களுக்கும் இளம்றோயல் விளையாட்டுக் கழகம் சார்பாக நன்றிகளும் பாராட்டுக்களும் தெரிவிக்கப்பட்டதோடு, மாலை 7 மணிக்கு பரிசளிப்பு நிகழ்வுடன் இச்சுற்று போட்டி நிறைவு பெற்றது.

ராஜரட்ட பல்கலைக்கழகத்துடன் திருமலை வளாக நிர்வாகத்தை இணைக்க முயற்சி: புத்திஜீவிகள் கண்டிப்பு

[ வெள்ளிக்கிழமை, 19 யூலை 2013, 02:17.26 PM GMT ]

கிழக்குப் பல்கலைக்கழக திருகோணமலை வளாகத்தின் நிர்வாகத்தை அனுராதபுர மாவட்டத்தின் ராஜரட்ட பல்கலைக்கழகத்துடன் இணைப்பதற்கு மேற்கொள்ளப்படும் முயற்சிகளை வன்மையாகக் கண்டிப்பதாக – திருகோணமலை வாழ் தமிழ் புத்திஜீவிகளும், கல்வி ஆர்வலர்களும், திருகோணமலை தமிழ் சமூகத்தினரும் தெரிவித்துள்ளனர்.

இது குறித்து, அவர்கள் வெளியிட்டுள்ள பத்திரிகைக் குறிப்பில் மேலும் தெரிவிக்கப்பட்டிருப்பதாவது.

கிழக்குப் பல்கலைக்கழகத்தின் ஒரு அங்கமாகச் செயற்பட்டு வரும் திருகோணமலை வளாகம், கிழக்கிலங்கைக்குக் கிடைத்துள்ள அரியதொரு வரப்பிரசாதம் மட்டுமல்லாது, திருகோணமலை மாவட்டத்திற்கான உயர் கல்வித்துறை நிறுவனங்களில் தலையாயதுமாகும்.

இந்த வளாகம், திருகோணமலை மாவட்டத்துக்கு ஆற்ற வேண்டிய கடப்பாடுகள் நிறையவுள்ள நிலையிலும், இந்த வளாகம் தனித்ததொரு பல்கலைக்கழகமாக உருவாக வேண்டும் என்ற எதிர்பார்ப்புக்கள் நிலவுகின்ற சூழலிலும் - இந்த வளாகத்தை கிழக்குப்பல்கலைக்கழகத்தின் நிர்வாக கட்டமைப்பிற்குள்ளிருந்து பிரித்து, ராஜரட்ட பல்கலைக்கழகத்தின் கீழ் கொண்டுவருவதான முயற்சிகள் வன்மையாகக் கண்டிக்கப்பட வேண்டியதாகும்.

ராஜரட்ட பல்கலைக்கழகத்துடன் திருகோணமலை வளாகம் இணைக்கப்படுமிடத்து அது முழுமையாக தனது அடையாளத்தை இழக்கும் அபாயம் உள்ளது. இவ்வாறான முயற்சிகள் ஆரம்பகட்டத்திலேயே தடுக்கப்பட வேண்டும் எனவும் அவர்கள் வலியுறுத்துகின்றனர்.

கிழக்கிலங்கைக்கு உரித்தான இக்கல்வி வளம் தொடர்ந்தும் கிழக்கிலங்கைக்கே உரித்தானதாக தொடரப்படும் அதேவேளை, திருகோணமலை வளாகத்தை ஒரு பல்கலைக்கழகமாக உருவாக்குவதிலும் - கிழக்குப்பல்கலைக்கழகம் தனது ஆக்கபூர்வமான கடமையைச் செய்ய முன்வரவேண்டும் எனவும் திருகோணமலை வாழ் தமிழ் புத்திஜீவிகளும் தமிழ் ஆர்வலர்களும், திருகோணமலை தமிழ் சிவில் சமூகத்தினரும் வேண்டுகோள் விடுக்கின்றனர்.

இந்த முயற்சிகளில் அரசியல், இன, மத பேதமற்று அனைவரும் ஒன்றிணைய வேண்டுமெனவும் அவர்கள் மேலும் கேட்டுக்கொண்டுள்ளனர்.

http://www.tamilwin.net/show-RUmryHSdMUms4.html