மலேசியாவில் புலிகளை சந்தித்தாரா ரணில்? பரபரப்பைக் கிளப்பும் சிங்கள ஊடகம்

வெள்ளவத்தை கடற்பரப்பில் பொலிஸ் கான்ஸ்டபிளின் சடலம் மீட்பு

[ திங்கட்கிழமை, 27 ஒக்ரோபர் 2014, 07:36.18 AM GMT ]

கொழும்பு வெள்ளவத்தை கடற்பரப்பில் பொலிஸ் கான்ஸ்டபிள் ஒருவரின் சடலம் மீட்கப்பட்டுள்ளதாக பொலிஸார் தெரிவித்தனர்.

வெள்ளவத்தைப் பகுதியில் 42ஆவது ஒழுங்கைக்கு அருகிலுள்ள கடற்கரையில் சடலம் இன்று காலை மீட்கப்பட்டுள்ளதாக பொலிஸார் தெரிவித்துள்ளனர்.

கடற்கரையிலுள்ள கற்பாறைகளுக்கிடையிலிருந்தே குறித்த சடலம் மீட்கப்பட்டுள்ளது.

சம்பவம் தொடர்பில் மேலதிக விசாரணைகளை பொலிஸார் மேற்கொண்டு வருகின்றனர்.

http://www.tamilwin.com/show-RUmszARbKXloy.html

எதிர்க்கட்சியிடம் சிக்கியுள்ள அமைச்சர்களின் ரகசியங்கள்- ரணிலின் பேச்சுவார்த்தை தோல்வி

[ திங்கட்கிழமை, 27 ஒக்ரோபர் 2014, 06:57.09 AM GMT ]

முக்கிய அமைச்சர்கள் சிலர் தொடர்பான இரகசிய புலனாய்வு அறிக்கைகள் அடங்கிய கோப்புகள் எதிர்க்கட்சி வசம் கிடைத்துள்ளதாக தெரியவந்துள்ளது.

அமைச்சர்களின் இரகசிய செயற்பாடுகள் மற்றும் ஊழல், மோசடிகள் தொடர்பான தகவல்களைத் திரட்டுவதற்கு தலா இரண்டு பேர் வீதம் புலனாய்வுப் பிரிவினர் நியமிக்கப்பட்டுள்ளனர். இவர்கள் வாரம் தோறும் அமைச்சர்களின் செயற்பாடுகள் தொடர்பான இரகசிய அறிக்கையொன்றை தயாரித்து, புலனாய்வுப் பிரிவின் மூலமாக ஜனாதிபதிக்கு சமர்பிப்பது வழக்கமாக இருந்தது.

இந்நிலையில் முக்கிய அமைச்சர்கள் சிலரின் மோசடிகள் தொடர்பான கோப்புகள் ஐக்கிய தேசிய கட்சியின் வசம் கிடைத்துள்ளதாக நம்பகமான தகவல் வட்டாரங்கள் தெரிவிக்கின்றன.

எதிர்வரும் ஜனாதிபதித் தேர்தல் மற்றும் பொதுத் தேர்தலின் போது அவற்றை வெளியிட ஐக்கிய தேசியக் கட்சி தீர்மானித்துள்ளது.

குறித்த அறிக்கைகள் வெளியே கசிந்துள்ள விபரம் தற்போது ஆளுங்கட்சிக்கும் தெரிய வந்துள்ளது. இதன் காரணமாக அமைச்சர்கள் சிலருக்கு உள்ளூர நடுக்கம் ஏற்பட்டிருப்பதாக தகவல்கள் தெரிவிக்கின்றன.

வெகுஜன அமைப்புகள் மற்றும் ரணில் இடையிலான பேச்சுக்கள் இணக்கமின்றி முடிந்தது

எதிர்வரும் ஜனாதிபதித் தேர்தலில் பொது வேட்பாளர் ஒருவரை நிறுத்துவது தொடர்பில் இணக்கத்தை ஏற்படுத்துவதற்காக ஐக்கிய தேசியக் கட்சியின் தலைவர் ரணில் விக்ரமசிங்க மற்றும் சில வெகுஜன அமைப்புகளுக்கு இடையில் கோட்டே நாக விகாரையில் நேற்றிரவு இடம்பெற்ற பேச்சுவார்த்தை தோல்வியடைந்துள்ளதாக நீதிக்கான தேசிய அமைப்பின் பேச்சாளர் ஒருவர் தெரிவித்துள்ளார்.

நாக விகாரையில் நேற்றிரவு 9 மணியளவில் நடந்த இந்த பேச்சுவார்த்தையில் மாதுளுவாவே சோபித தேரரின் நீதிக்கான தேசிய அமைப்பு மற்றும் அத்துரலியே ரத்ன தேரரின் தூய்மையான நாளை அமைப்பின் பிரதிநிதிகள் கலந்து கொண்டனர்.

இந்த அமைப்பின் பிரதிநிதிகளை தவிர மனோ கணேசன், அசாத் சாலி ஆகிய அரசியல் கட்சி தலைவர்களும் கலந்து கொண்டுள்ளனர்.

ஜனாதிபதித் தேர்தல் தொடர்பான கலந்துரையாடலை ஆரம்பித்த குறித்த அமைப்புகள், இம்முறை ஜனாதிபதித் தேர்தலில் போட்டியிடாது பொது வேட்பாளர் ஒருவரை நிறுத்துமாறு ஐக்கிய தேசியக் கட்சியின் தலைவரிடம் கோரிக்கை விடுத்தன.

அவ்வாறான பொது வேட்பாளர் ஒருவர் போட்டியிட்டால், ஜே.வி.பி, ஜாதிக ஹெல உறுமய ஆகிய கட்சிகளின் ஆதரவை பெற முடியும் என அமைப்பின் பிரதிநிதிகள், ரணில் விக்ரமசிங்கவிடம் விளக்கியுள்ளனர்.

இந்த கோரிக்கையை நிராகரித்த ரணில், எதிர்க்கட்சிகளின் பிரதான கட்சியான ஐக்கிய தேசியக் கட்சியின் வேட்பாளர் ஒருவர் நிறுத்தப்படுவதன் அவசியத்தை தெளிவுப்படுத்தியதுடன் இம்முறை ஜனாதிபதித் தேர்தலில் போட்டியிட தான் தீர்மானித்திருப்பதாகவும் தேர்தலில் போட்டியிட போவதாகவும் கூறியுள்ளார்.

இதனையடுத்து இந்த பேச்சுவார்த்தைகள் எவ்வித இணக்கப்பாடுகளும் இன்றி முடிவடைந்துள்ளன.

பொது வேட்பாளர் தொடர்பாக சரியான முடிவு எட்டப்படும் வரை ரணில் விக்ரமசிங்க முன்வைத்துள்ள யோசனைகளுக்கு இணங்குவதில்லை என சந்திப்பில் கலந்து கொண்ட அமைப்புகள் ஏகமனதாக தீர்மானித்துள்ளன.

இந்த பேச்சுவார்த்தை ஆரம்பிக்கப்படுவதற்கு சற்று முன்னதாக ஜே.வி.பியின் பிரச்சார செயலாளர் விஜித ஹேரத் நாக விகாரைக்கு வந்து மாதுளுவாவே சோபித தேரரை சந்தித்து விட்டு திரும்பியதாக தகவல்கள் தெரிவிக்கின்றன.

பொதுச் சின்னத்தில் போட்டியிட்டால் ஆதரவு: அரசாங்கத்தின் அமைச்சர்கள் ரணிலுக்கு அறிவிப்பு

ஜனாதிபதித் தேர்தலில் ஐக்கிய தேசியக் கட்சியின் வேட்பாளர் அந்த கட்சியில் சார்பில் போட்டியிடாது சுயாதீனமான வேட்பாளராக போட்டியிட்டால், ஆதரவு வழங்குவது குறித்து ஆராய்ந்து பார்க்க முடியும் என அரசாங்கத்தின் அமைச்சர்கள் அணியொன்று ஐக்கிய தேசியக் கட்சியின் தலைவருக்கு அறிவித்துள்ளது.

இதனால், ஐக்கிய தேசியக்கட்சியின் வேட்பாளர் யானைச் சின்னத்தில் போட்டியிடாது பொதுச் சின்னத்தில் போட்டியிட்டால் நிபந்தனையின்றி ஆதரவு வழங்கவும் அவர்கள் விருப்பம் தெரிவித்துள்ளனர்.

இப்படியான நிலைமையில், பொது வேட்பாளர் வெற்றி பெற்றதால், கட்சியின் தலைமைத்துவம் தொடர்பில் யாப்பு ரீதியான நெருக்கடி ஏற்படாது.

அத்துடன் வெற்றி பெறும் வேட்பாளருக்கு கட்சியின் தலைவர் பதவி கட்டாயம் கிடைக்க வேண்டும் என அரசியலைமைப்பில் கூறப்பட்டுள்ளது.

இந்த விடயம் தொடர்பில் பலத்தரப்புக்களுடன் பேச்சுவார்த்தை நடத்தியதாக ஐக்கிய தேசியக் கட்சியின் பேச்சாளர் ஒருவர் கூறியுள்ளார்.

http://www.tamilwin.com/show-RUmszARbKXmx6.html

களனியிலிருந்து என்னை எவராலும் வெளியேற்ற முடியாது: மேர்வின் சில்வா

[ திங்கட்கிழமை, 27 ஒக்ரோபர் 2014, 06:45.02 AM GMT ]

களனி தேர்தல் தொகுதியில் இருந்து எவராலும் தன்னை வெளியேற்ற முடியாது எனவும் மக்களால் மாத்திரமே தனது அரசியல் பயணத்தை நிறுத்த முடியும் எனவும் அமைச்சர் மேர்வின் சில்வா தெரிவித்துள்ளார்.

அவர் மேலும் தெரிவிக்கையில்,

எவர் கூறினாலும் நான் களனியில் இருந்து போக மாட்டேன். மக்கள் போகுமாறு கூறும் நாளில் நான் சென்று விடுவேன்.

களனி தொகுதியில் வாழ்வதற்காகவே கிரிபத்கொடையில் வீட்டை கொள்வனவு செய்தேன்.

திருமணம் செய்யாமல் இருந்தால், நான் களனி பெண்ணை திருமணம் செய்திருப்பேன்.

கிராமத்தில் படுத்து உறங்குவது போல் இன்றும் நான் பாயிலேயே படுத்து உறங்குகிறேன்.

பாயில் படுத்து உறங்குவதால் கீழே விழுவதில்லை.

எவ்வாறாயினும் எனது அன்பான மக்களால் மாத்திரமே என் அரசியல் பயணத்தை நிறுத்த முடியும் எனவும் அமைச்சர் மேர்வின் சில்வா குறிப்பிட்டுள்ளார்.

http://www.tamilwin.com/show-RUmszARbKXmx5.html

மலேசியாவில் புலிகளை சந்தித்தாரா ரணில்? பரபரப்பைக் கிளப்பும் சிங்கள ஊடகம்

[ திங்கட்கிழமை, 27 ஒக்ரோபர் 2014, 06:33.44 AM GMT ]

விடுதலைப் புலிகளின் முக்கியஸ்தர்களை ரணில் விக்கிரமசிங்க மலேசியாவில் சந்தித்திருப்பதாக சிங்கள ஊடகம் ஒன்று மீண்டும் பரபரப்பைக் கிளப்பியுள்ளது.

மவ்பிம இரிதா என்ற சிங்களப் பத்திரிகையின் ஒன்பதாம் பக்கத்தில் இந்தச் செய்தி குறிப்பிடப்பட்டுள்ளது.

ஐக்கிய தேசியக்கட்சித் தலைவர் ரணில் விக்கிரமசிங்க அண்மையில் சிங்கப்பூருக்கான குறுகிய கால விஜயமொன்றை மேற்கொண்டிருந்தார். மருத்துவ பரிசோதனைக்காக அவர் சிங்கப்பூர் செல்வதாக அப்போது தெரிவிக்கப்பட்டிருந்தது.

எனினும் ரணில் விக்கிரமசிங்க சிங்கப்பூரிலிருந்து தரை மார்க்கமாக மிகவும் இரகசியமாக மலேசியாவுக்கு விஜயம் மேற்கொண்டதாக மவ்பிம பத்திரிகை குறிப்பிட்டுள்ளது.

மலேசியாவில் விடுதலைப் புலிகளின் முக்கிய அமைப்பான குளோபல் தமிழ் போரம் (ஜீ.ரி.எப்) அமைப்பின் பிரநிதிகள் அக்காலப் பகுதியில் ஒன்றுகூடியிருந்தார்கள். அவர்களை சந்திக்கவே அவர் அவ்வாறு சென்றிருக்கக் கூடும் என்றும் அந்த ஊடகம் தெரிவித்துள்ளது.

மேலும் ரணிலின் சிங்கப்பூர் மற்றும் மலேசிய பயணத்துக்கான செலவை விடுதலைப் புலிகளுக்கு ஆதரவான இலங்கைத் தமிழர் ஒருவர் ஏற்றுக் கொண்டதாகவும், குறித்த சந்திப்புக்கு அவரே ஏற்பாடு செய்துள்ளதாகவும் அந்தச் செய்தியில் குறிப்பிடப்பட்டுள்ளது.

தற்போது இது தொடர்பாக அரசாங்கப் புலனாய்வுப் பிரிவின் விசாரணைகள் ஆரம்பிக்கப்பட்டிருப்பதாகவும் மவ்பிம பத்திரிகை செய்தி வெளியிட்டுள்ளது.

மவ்பிம பத்திரிகையின் உரிமையாளர் டிரான் அலஸ் பாதுகாப்புச் செயலாளர் கோட்டாபயவின் நெருங்கிய நண்பர் என்பது குறிப்பிடத்தக்கது.

http://www.tamilwin.com/show-RUmszARbKXmx4.html