தேசிய தலைவர் பிரபாகரன் அவர்களை ஏற்றிச் செல்லவந்த கப்பல் எங்கே ?

விடுதலைப் புலிகளின் தலைவர் பிரபாகரன் இலங்கையில் நடந்த ஜனாதிபதி தேர்தலில் பொதுமக்களை வாக்களிக்க விடாமல் தடுத்த காரணத்தால், பொதுமக்களுக்கு மகா சிக்கலை ஏற்படுத்திவிட்டு சென்றுவிட்டார்” என்று இலங்கை எதிர்க்கட்சி தலைவர் ரணில் விக்கிரமசிங்கே தெரிவித்துள்ளார். அதாவது 2005ம் ஆண்டு இலங்கையில் ஜனாதிபதி தேர்தல் நடைபெற்றவேளை, இலங்கையில் ரணில் மற்றும் மகிந்தர் ஆகிய இருவரும் கிட்டத்தட்ட ஒரே பலத்தில் தான் இருந்தார்கள். நடந்து முடிந்த தேர்தலில் வெறும் 1 லட்சத்தி 75 ஆயிரம் வாக்கு வித்தியாசத்தில் தான் மகிந்தர் வெற்றி ஈட்டினார். அன்றைய நாட்களில் புலிகள் வட கிழக்கும் மக்களுக்கு ஒரு அறிவித்தலை விடுத்தார்கள். அதாவது சிங்களம் தமது தலைமையை தேர்ந்து எடுக்கட்டும் என்பது அவர்கள் விடுத்த அறிக்கை ஆகும். அதனை ஏற்று சுமார் 6 லட்சம் தமிழர்கள் வாக்களிக்கவே இல்லை. 90 சதவீதமான தமிழர்கள் ஜனாதிபதி தேர்தலை புறக்கணித்தார்கள்.

அன்றைய தினம் 6 லட்சம் தமிழர்களும் ரணிலுக்கு வாக்களித்திருந்தால், ரணில் தான் இப்போது ஜனாதிபதியாக அமர்ந்திருப்பார். அது வேறுவிடையம். ஆனால் புலிகள் அப்படிச் செய்யவில்லை. காரணம் ரணில் அரசே கருணாவைப் பிரித்தது என்று அவர்கள் திடமாக நம்பினார்கள். அமெரிக்காவுடன் மிகவும் நெருக்கமாக இருக்கும் ரணில் ஆட்சிக்கு வந்தால் பெரும் பாதிப்பு நிகழலாம் என்றும் அவர்கள் கருதினார்கள். இதனாலேயே தமிழர்களை மெளனம் காக்குமாறு அன்று புலிகள் அறிவித்தார்கள். அபோது தோற்றுப்போன ரணில் இதுவரை மீண்டு எழவில்லை. ஆனால் அவர் மட்டக்களப்பு பகுதியில் உள்ள தமிழ் மக்கள் மத்தியில் சமீபத்தில் உரையாற்றும்போது, தனது வெறுப்பை புலிகள் மீது காட்டினார். தாம் ஜனாதிபதியாக முடியவில்லை என்ற ஆதங்கத்தை அவர் அங்கே வெளிப்படுத்தியதோடு என்றுவிடவில்லை.

தேசிய தலைவர் பிரபாகரனை ஏற்றிச்செல்லவந்த கப்பல் எங்கே என்றும் கேள்வி எழுப்பியுள்ளார். இதற்கு இலங்கை அரசு பதில்செல்ல முடியுமா என்றும் அவர் மேடையில் பேசும் போது கூறியுள்ளார் என்று அதிர்வு இணையம் அறிகிறது.