கச்சதீவில் சீன இராணுவம் : இந்தியாவை வேவுபார்க்கிறதா ?

சமீபகாலமாக கச்சதீவு கடற்பரப்பில் இலங்கை கடற்படையின் பிரசன்னம் அதிகரித்துள்ளது. சுமார் 12 டோரா ரக தாக்குதல் படகுகளை அங்கே இலங்கை கடற்படை நிறுத்திவைத்துள்ளது. போதாக்குறைக்கு ஒரு போர் கப்பலும் அங்கே நிலைகொண்டுள்ளது. இக் கப்பலில் சீன இராணுவ அதிகாரிகள் இருப்பதாகவும், அவர்கள் இலங்கை கடற்படைக் கப்பலுக்குள் இருந்ததை சில மீனவர்கள் கண்டதாகவும் செய்திகள் வெளியாகியுள்ளது. சீன இராணுவத்தினர் இந்தியாவை வேவுபார்க்கும் கருவிகளுடன் கச்சதீவுக்கு அருகே நிலைகொண்டுள்ளார்களா என்ற சந்தேகம் தற்போது வலுப்பெற்றுள்ளது. இதனையடுத்து இந்தியப் பிரதமருக்கு மதிமுக தலைவர் மற்றும் உணர்வாளர் வைகோ அவர்கள் கடிதம் ஒன்றை அனுப்பிவைத்துள்ளார். 

வைகோ மன்மோகன் சிங்கிற்கு எழுதியுள்ள கடிதம் தொடர்பாக இலங்கை அரசு பெரும் விசனமடைந்துள்ளது என்று கூறப்படுகிறது. இதேவேளை தமது கடற்படைக் கப்பலில் வெளிநாட்டவர்கள் எவரும் இருக்கவில்லை என்று இன்றைய தினம் இலங்கை கடற்படையினர் அறிக்கை ஒன்றை வெளியிட்டுள்ளார்கள். கச்சதீவுக்கு அருகாமையில் தாம் பாதுகாப்பு பணியில் மட்டுமே ஈடுபட்டுள்ளதாக இலங்கை கடற்படை இன்று தெரிவித்துள்ளது. தமது 12 க்கும் மேற்பட்ட படகுகள் அங்கே நிலைகொண்டுள்ளதை, இலங்கை கடற்படையினர் உறுதிசெய்துள்ளார்கள்.

இருப்பினும் வழமைக்கு மாறாக ஏன் அச் சிறிய தீவைச் சுற்றி , இலங்கை கடற்படை தனது பாதுகாப்பை அதிகரித்துள்ளது என்பது புரியாத புதிராகவே உள்ளது. சீன அதிகாரிகள் போர் கப்பலில் உள்ளதால் தான் சிறிய படகுகள் மூலம் அப் பகுதியை இலங்கை கடற்படையினர் பாதுகாத்து வருவதாக ஊர்ஜிதமற்ற சில செய்திகள் மேலும் தெரிவிக்கின்றன. எது எவ்வாறு இருப்பினும், இலங்கையால் இந்தியாவுக்கு தொடர்ந்தும் அச்சுறுத்தல் நிலவிவருகிறது என்பதே உண்மை நிலையாகும்.

http://www.athirvu.com/target_news.php?getnews=news&action=fullnews&showcomments=1&id=5138