ஐநா தீர்மான வரைபில் சர்வதேச விசாரணை குறித்து தெளிவில்லை!

[ பி.பி.சி ]

ஜெனிவாவில் தொடங்கியுள்ள ஐ.நா மன்ற மனித உரிமைக் கவுன்சிலில் இலங்கைப் போரின் இறுதிக்கட்டங்களில் நடந்ததாகக் கூறப்படும் போர்க்குற்றங்கள் மற்றும் மனித உரிமை மீறல்கள் குறித்து விசாரிப்பது தொடர்பாக அமெரிக்கா, பிரிட்டன் உள்ளிட்ட நில நாடுகள் கொண்டுவரவிருக்கும் முன்வரைவின் நகல்கள் கசிந்திருக்கின்றன.

இலங்கை தொடர்பாக ஒரு சர்வதேச விசாரணையை கோரும் தீர்மானம் முன்வைக்கப்படும் என்ற பரவலாக எதிர்பார்க்கப்பட்ட நிலையில் வரும் இந்த முன்வரைவு, இது குறித்து தெளிவாக எதுவும் குறிப்பிடவில்லை.

ஆனால், இலங்கைப் போரில் ஏற்பட்ட மனித உரிமை மீறல்கள் குறித்து உள்நாட்டளவில் ஒரு நம்பகத்தன்மை வாய்ந்த வழிமுறை மூலமாக தெளிவாகத் தெரியும் பலன் ஏதும் கிடைக்காத நிலையில், ஒரு சுயாதீனமான, நம்பகத்தன்மை வாய்ந்த, சர்வதேச விசாரணை வேண்டும் என்று மனித உரிமை ஆணையர் பரிந்துரைத்திருப்பதை இத்தீர்மான முன்வரைபு வரவேற்கிறது.

மேலும், இந்த முயற்சியில், ஆணையர், பொறுப்பு சுமத்துவது மற்றும் நல்லிணக்கத்தை எட்டுவது என்பதில் ஏற்பட்டுள்ள முன்னேற்றத்தைக் கணித்து, இது குறித்து ஏற்பட்டுள்ள தேசிய அளவிலான வழிமுறைகளின் முன்னேற்றத்தையும் கண்காணித்து, இலங்கைப் போரின் இரு தரப்புகளும் போரில் இழைத்த்தாகக் கூறப்படும் மீறல்கள் மற்றும் துஷ்பிரயோகங்களை விசாரிக்கவேண்டும் என்றும் அது கோருகிறது.

இந்த விசாரணையின் முடிவில், ஆணையர் மனித உரிமைக் கவுன்சிலின் 27வது அமர்வில் ஒரு வாய்மொழி அறிக்கையை சமர்ப்பிக்கவேண்டும் என்றும், முழுமையான அறிக்கையை அதற்கடுத்த, அதாவது 28வது அமர்வில் சமர்ப்பிக்கவேண்டும் என்றும் கோருகிறது.

இதனிடையே, இலங்கை அரசும், இந்த குற்றச்சாட்டுகள் மீது ஒரு சுயாதீனமான நம்பகத்தன்மை வாய்ந்த விசாரணையை நடத்தவேண்டும் என்றும் அது கோருகிறது.

மேலும், இலங்கை அரசு அமைத்த நல்லிணக்க ஆணையத்தின் ஆக்கபூர்வமான பரிந்துரைகளையும் இலங்கை சரியாக அமல்படுத்தவேண்டும், 13 சட்டத்திருத்த்தின் அடிப்படையில், வட மாகாணத்துக்கு உரிய தேவையான வளங்களையும், ஆட்சி செய்ய தேவைப்படும் அனைத்து அதிகாரங்களையும் வழங்க வேண்டும், அனைத்து மத வழிபாட்டிடங்கள் மீதும் நடத்தப்படும் தாக்குதல்களை விசாரிக்கவேண்டும், இது போன்ற தாக்குதல்கள் எதிர்காலத்தில் நடக்காமல் தடுக்கவேண்டும், மேலும், ஊடகவியலாளர்கள், மனித உரிமை ஆர்வலர்கள், மதச்சிறுபான்மையினர், சிவில் சமூக உறுப்பினர்கள் மீது நடத்தப்படும் தாக்குதல்களுக்குப் பொறுப்பானவர்கள் மீது நடவடிக்கை எடுக்கப்படவேண்டும் என்றும் இத்தீர்மானம் கோருகிறது.

இத்தீர்மான முன்வரைவு குறித்து புலம்பெயர் தமிழ்த் தன்னார்வக் குழுக்கள் ஏமாற்றம் தெரிவித்துள்ளன.

இலங்கை அரசும் இத்தீர்மான முன்வரைவை நிராகரித்திருக்கிறது. இது குறித்து கருத்து வெளியிட்ட இலங்கை அமைச்சரவைக்காகப் பேசவல்ல அமைச்சர் கெஹலிய ரம்புக்வல, இலங்கைப் போரின் பின்னர் நல்லிணக்கம் போன்றவற்றுக்கு இலங்கை அரசாங்கம் தானே உரிய நடவடிக்கைகளை எடுத்துவரும் நிலையில், இப்படியான ஒரு தீர்மானத்துக்கு அவசியமே கிடையாது என்று கூறியுள்ளார்.

• நவி.பிள்ளையின் நகல் அறிக்கை: அதிர்ச்சியில் மனித உரிமை ஆர்வலர்கள்
• http://news.lankasri.com/show-RUmsyDTYLVlw3.html

அமெரிக்கத் தீர்மானம் ஏமாற்றமளிக்கி​றது!- பழ. நெடுமாறன் கண்டன அறிக்கை

[ செவ்வாய்க்கிழமை, 04 மார்ச் 2014, 02:58.25 PM GMT ]

அமெரிக்காவின் தீர்மானம் தமிழர்களுக்கு ஏமாற்றம் அளிக்கும் தீர்மானமாகும். இந்தத் தீர்மானத்திற்கு திருத்தங்கள் கொண்டு வந்து ஈழத் தமிழர்களுக்கு நீதி கிடைக்க உதவ வேண்டியது உலக நாடுகளின் கடமையாகும். என உலகத் தமிழர் பேரமைப்பின் தலைவர் பழ. நெடுமாறன் தெரிவித்துள்ளார்.

உலகத் தமிழர் பேரமைப்பின் தலைவர் பழ. நெடுமாறன் விடுத்துள்ள அறிக்கை

ஐ.நா. மனித உரிமை ஆணையத்தில் அமெரிக்கா, பிரிட்டன், மாண்டிநீக்ரோ, மாசிடோனியா, மொரிசீயஸ் ஆகிய நாடுகள் இணைந்து கூட்டாக கொண்டு வந்திருக்கும் தீர்மானம் புதிய மொந்தையில் தரப்படும் பழைய கள்ளே ஆகும்.

ஐ. நா. மனித உரிமை ஆணையர் பரிந்துரைத்தப்படி சுதந்திரமான சர்வதேச விசாரணை நடத்தப்படுவதற்கு நிபந்தனை விதிக்கப்பட்டிருக்கிறது.

இலங்கை அரசே நம்பகத்தன்மையும் உருப்படியான நடவடிக்கைகளும் கொண்ட விசாரணைக் குழுவை அமைத்து செயற்பட தவறினால் சுதந்திரமான நம்பகத்தன்மையுள்ள சர்வதேச விசாரணை நடத்த வேண்டிய அவசியம் ஏற்படும் என இத்தீர்மானத்தில் கூறப்பட்டுள்ளது.

ஏற்கெனவே கடந்த 4 ஆண்டுகளில் இரண்டு முறை அமெரிக்கா கொண்டு வந்த தீர்மானத்தின்படி ராஜபக்ச அரசே இழைக்கப்பட்ட அநீதிகளுக்கு விசாரணை நடத்தவும் பாதிக்கப்படட மக்களுக்கு உதவி செய்யவும் வேண்டுமென வற்புறுத்தப்பட்டது.

ஆனால் இத்தீர்மானங்களை ராஜபக்ச அரசு கொஞ்சமும் சட்டை செய்யவில்லை. மீண்டும் அவருக்கு இரண்டாண்டு காலம் அவகாசம் கொடுப்பது என்பது இலங்கையில் எஞ்சியிருக்கும் தமிழர்களை அழிப்பதற்கு துணை போவதாகும். இதை நான் வன்மையாகக் கண்டிக்கிறேன்.

அடுத்து இந்தத் தீர்மானத்தில் 13வது சட்டத்திருத்தத்தின்படி வடக்கு மாநில முதலமைச்சருக்கு தேவையான அதிகாரத்தையும் நிதியையும் வழங்க வேண்டும் என்று சொல்லப்பட்டிருக்கிறது.

13-ஆவது சட்டத்திருத்தத்தையே உச்சநீதிமன்ற ஆணையின் மூலம் ராஜபக்ச சாகடித்து விட்டார். இப்போது 13வது சட்டத்திருத்தமே இல்லை. அதன்படி தமிழர்களுக்கு அதிகாரம் வழங்குவது என்பது நடக்கப்போகாத ஒன்றாகும்.

அமெரிக்காவின் தீர்மானம் தமிழர்களுக்கு ஏமாற்றம் அளிக்கும் தீர்மானமாகும். இந்தத் தீர்மானத்திற்கு திருத்தங்கள் கொண்டு வந்து ஈழத் தமிழர்களுக்கு நீதி கிடைக்க உதவ வேண்டியது உலக நாடுகளின் கடமையாகும்.