யாழில் நடக்கும் மர்மங்கள் என்ன? உயர் பொலிஸ் அதிகாரி பரபரப்பு தகவல்

யாழ்ப்பாணத்தில் மாணவர்கள் இருவர் கொலை செய்யப்பட்டமை மற்றும் பொலிஸ் புலானாய்வு பிரிவு உறுப்பினர்கள் இருவர் தாக்கப்பட்ட சம்பவங்கள் ஆகியவை ராஜபக்ச தரப்பு சூழ்ச்சியாளர்களின் செயற்பாடு என யாழ்ப்பாணத்தில் பணி யாற்றிய உயர் பொலிஸ் அதிகாரி ஒருவர் ஆதாரங்களுடன் தகவல் வெளியிட்டுள்ளார்.

யாழில் பொலிஸாரின் துப்பாக்கி பிரயோகத்தில் சிவில் உறுப்பினர்கள் உயிரிழந்த சம்பவங்கள் 1980ஆம் ஆண்டுகளுக்கு பின்னர் இடம்பெற்ற சம்பவமாகும்.

யுத்ததின் போதும் இராணுவத்தினரால் துப்பாக்கி பிரயோகம் மேற்கொள்ளப்பட்டதற்கு பொலிஸார் துப்பாக்கி பிரயோகம் மேற்கொண்டு பொது மக்களை கொலை செய்யப்படாத நிலையில், மோட்டார் சைக்கிளை நிறுத்தவில்லை என்ற காரணத்திற்காக பொலிஸார் துப்பாக்கி பிரயோகம் மேற்கொண்டுள்ளமை முழுமையான ஒரு சூழ்ச்சி சம்பவமாகும்.

மோட்டார் சைக்கிள் நிறுத்தப்படவில்லை என்றால் துரத்தி பிடிப்பதற்கு வாகன இல்லாத சந்தர்ப்பங்களில் பொலிஸார் மோட்டார் சைக்கிளின் இலக்கத்தை பதிவு செய்துக் கொண்டு மோட்டார் வாகன பதிவு திணைக்களத்தில் இது தொடர்பில் தகவல் பெற்றுக் கொண்டு விசாரணை மேற்கொள்ள வேண்டும்.

முன்னர் போன்று இன்றி தற்போது மோட்டார் வாகன திணைக்களத்திற்கு வாகனத்தின் இலக்கத்தை வழங்கினால் சில மணித்தியாளங்களுக்குள் தகவல் பெற்றுக் கொள்ள கூடிய வகையில் உள்ளது.

இந்நிலையில், வாகனத்தை நிறுத்தவில்லை என்பதற்காக துப்பாக்கி பிரயோகத் மேற்கொள்ளப்பட்டுள்ளதென்பது முழுமையாக யாருடையதோ துண்டுதலுக்கமைய மேற்கொள்ளப்பட்ட சம்பவம் என பொலிஸார் உயர் அதிகாரி தெரிவித்துள்ளார்.

இன்னுமொரு பக்கத்தில் அவசர சட்டம் இல்லாத நிலையில் பொலிஸ் அதிகாரிகள் உயர் பொலிஸ் அதிகாரியின் அனுமதியின்றி டீ - 56 ரக துப்பாக்கியில் ஒரே சந்தர்ப்பத்தில் துப்பாக்கி பிரயோகம் மேற்கொள்வதற்கு அனுமதி இல்லாத நிலையில் இப்படி ஒரு சம்பவம் சாதாரணமாக இடம்பெற முடியாது என அவர் குறிப்பிட்டுள்ளார்.

இவ்வாறான நிலைமையினுள் ராஜபக்சர்களின் ஆதரவாளரான தற்போதைய பாதுகாப்பு செயலாளர், துப்பாக்கி சூட்டு சம்பவத்தின் பதற்றம் தணிவதற்குள் அது சரியென கருத்து வெளியிட்டுள்ளமை சூழ்ச்சியின் ஒரு பகுதியாகும். பாதுகாப்பு செயலாளர் என்பவர் சம்பவத்தை மேலும் தூண்டிவிடாமல் துப்பாக்கி பிரயோகம் மேற்கொண்ட அதிகாரிகளின் கடந்த காலங்கள் குறித்து தேடி பார்ப்பதே கடமையாகும் என அவர் கூறியுள்ளார்.

அது மாத்திரமின்றி நேற்று சாதாரண உடை அணிந்து மோட்டார் சைக்கிளில் பயணித்துக் கொண்டிருந்த பொலிஸ் புலனாய்வு சேவை உறுப்பினர்கள் இருவர் யாழ்ப்பாணம் சுன்னாகம் நகரத்தில் மத்தியில் வைத்து வெட்டப்பட்டமை யுத்தம் ஒன்றை தூண்டிவிடுவதற்காக ராஜபக்ச தரப்பினர்கள் மேற்கொள்ளும் சூழ்ச்சி என அவர் சுட்டிக்காட்டியுள்ளார்.

இலக்கு தகடுகள் இன்றி மூன்று மோட்டார் சைக்கிளில் வந்தவர்கள், நவரத்ன என்ற புலனாய்வு பிரிவு அதிகாரி மற்றும் ஹேரத் என்ற புலனாய்வு பிரிவு அதிகாரியை தாக்கியுள்ள சம்பவம் யாழ் மாணவர்களின் மரணத்தினால் மேற்கொள்ளப்பட்டதென ஒன்றை ஒன்று கோர்த்து விடுவதற்கு யாழ்ப்பாணத்தில் உள்ள ராஜபக்ச தரப்பு இராணுவ புலனாய்வு பிரிவு உறுப்பினர்கள் சிலரினால் மேற்கொள்ளப்பட்டதென சில காலம் யாழில் சேவை செய்த உயர் பொலிஸ் அதிகாரி குறிப்பிட்டுள்ளார்.

http://www.tamilwin.com/security/01/122059

நடந்த பிழையைத் திருத்துங்கள் பிழைக்காக பிழை செய்யாதீர்கள்!

யாழ்ப்பாணப் பல்கலைக்கழகத்தின் இரண்டு மாணவர்களின் மரணமே இன்று பேசுபடு பொருளாகியுள்ளது.

பொலிஸார் மேற்கொண்ட அநியாயமான செயலால் அருமந்த இரண்டு உயிர்கள் காவு கொள்ளப்பட்டு விட்டன.

இது மிகப்பெரிய பிழை. இத்தகைய பிழைகள் இனிமேல் நடக்காமல் இருப்பதற்கான ஏற்பாடுகள் செய்யப்பட வேண்டும்.

இதைவிடுத்து நடந்த ஒரு பிழையை மறைப்பதற்காக அல்லது அதனால் ஏற்படக்கூடிய பிற்தாக்கத்தைத் தடுப்பதற்காக எடுக்கப்படும் நடவடிக்கைகள் இன்னொரு பிழையை ஏற்படுத்திவிடக்கூடாது என்பதில் சம்பந்தப்பட்ட அனைவரும் விழிப்பாக இருக்க வேண்டும்.

பொலிஸார் சுட்டதில் இரண்டு மாணவர்கள் பலியான சம்பவம் சாதாரணமானதன்று. இந்தச் சம்பவம் நடந்த நிலையில், பல்கலைக்கழக மாணவர்கள் உள்ளிட்ட மக்கள் சமூகம் எதிர்ப்பை காட்டவே செய்யும்.

இவ்வாறான எதிர்ப்பைத் தடுப்பது என்பது நடந்த சம்பவம் தொடர்பில் எடுக்கப்படும் நடவடிக்கைகளும் அதன் மீதான நம்பிக்கைகளுமாகவே இருக்கும்.

ஆகையால் நடந்த சம்பவம் தொடர்பில் பக்கச் சார்பற்றதும் நம்பகத்தன்மைமிக்கதுமான விசாரணைகள் மேற்கொள்ளப்பட வேண்டும்.

இதைவிடுத்து மாணவர்களின் மரணத்தின் எதிரொலிப்பை தணிக்கை செய்வதாக நினைத்து பயங்கரமான காரியங்களைச் செய்ய எத்தனிப்பது திரும்பத் திரும்ப பிழைகள் நடப்பதற்கு வழிவகுக்கும்.

ஆகையால் ஒரு பிழையை, குற்றத்தை ஏற்றுக் கொண்டு அதற்குப் பரிகாரம் தேடப் பழகிக்கொள்வதே நல்லதும் நன்மை தரக்கூடியதுமாகும்.

இதைவிடுத்து திசை திருப்புதல் என்ற பேரில் மீண்டும் மீண்டும் பிழைகளை, குற்றங்களைச் செய்வது பாரதூரமான விளைவையே ஏற்படுத்தும்.

இது ஒருபுறம் இருக்க, நேற்றைய தினம் சுன்னாகப் பகுதியில் சிவில் உடையில் நின்ற இரண்டு பொலிஸாரை இனந்தெரியாதவர்கள் வாளால் வெட்டியதான சம்பவம் ஒன்று நடந்துள்ளது. இந்தச் சம்பவம் கண்டனத்துக்குரியது.

அதேவேளை இந்தச் சம்பவம் குறித்த உண்மை நிலையை உடனடியாக வெளிப்படுத்த வேண்டும்.

ஏனெனில் யாழ்ப்பாணப் பல்கலைக்கழக மாணவர்கள் இருவர் பொலிஸாரால் சுட்டுக் கொல்லப்பட்ட நிலையில்,அதில் ஒரு மாணவன் சுன்னாகம் கந்தரோடையைச் சொந்த இடமாகக் கொண்டவர்.

அவரின் இறு திக்கிரியை இன்று நடைபெற இருக்கின்ற வேளையில்,நேற்றைய தினம் சுன்னாகத்தில் வைத்து இரண்டு பொலிஸார் வாளால் வெட்டப்பட்டனர் என்பது ஒரு பெரும் சதி நோக்கம் கொண்டது என்பது தெளிவாகிறது.

பொதுவில் மக்கள் சமூகம் குழப்பமடையக்கூடிய சம்பவங்கள் இடம்பெற்றால், அதனைத் திசைதிருப்பும் நோக்கில் சில திட்டங்கள் தீட்டப்படுவது வழமை.

அதற்காக தீட்டப்படும் திட்டம் ஒரு இனத்துக்குப் பெரும்தாக்கத்தை ஏற்படுத்தக்கூடியதாக அமைக்கப் படுமாக இருந்தால் அது பயங்கரமானது.

ஆக, சுன்னாகத்தில் இரண்டு பொலிஸார் மீது வாளால் வெட்டப்பட்ட சம்பவம் தொடர்பில் உடனடியாக நிலைமையை விளக்கி குழப்பங்களைத் தடுப்பது பொலிஸ் தலைமையின் கடமையாகும்.

பொலிஸார் மீது வாள்வெட்டு நடத்தும் அளவில் யாழ்ப்பாணத்தில் ஏதோவொரு சக்தி இருப்பது போல மேற்கொள்ளும் காட்டாப்புக்கள் இந்த மண்ணில் மீண்டும் இராணுவ ரோந்துகள், சோதனைகள், கைதுகள், விசாரணைகள் என்ற துன்பியலை தொடங்குவதற்கான பூர்வாங்கமாகவே கருத முடியும்.

ஆகையால் உண்மை நிலையை உடன் வெளிப்படுத்தி பிழைகள் ஏற்படாமல் பாதுகாத்துக் கொள்ளுங்கள்.

http://www.tamilwin.com/politics/01/122102?ref=morenews