“தமிழீழத்தை உருவாக்கும் பொறிமுறையிலேயே நவிப்பிள்ளை வந்தார்” நல்லிணக்கம் சவாலானது கோத்தபாயதமிழீழத்தை உருவாக்கும் நிராயுத பொறி முறையில் நாடு கடந்த விடுதலைப் புலி ஆதரவாளர்கள் மேற்குலக நாடுகளின் அனுசரணையுடன் செயற்படுகின்றனர். இவர்கள் இலங்கைக்கு எதிராக பல்வேறு குற்றச் சாட்டுக்களையும் சாட்சியங்களையும் உருவாக்கியுள்ளனர். இவற்றின் நிழலாகவே ஐ. நா. மனித உரிமைகள் ஆணையாளர் நவநீதம்பிள்ளையின் நிகழ்ச்சி நிரலும் காணப்பட்டது என்று பாதுகாப்புச் செயலாளர் கோத்தபாய ராஜபக்ஷ தெரிவித்தார்.இறுதி யுத்தத்தின் போது வெறும் 26 பேர் மாத்திரமே இராணுவத்திடம் சரணடைந்து காணாமல் போனதாக தகவல்கள் உள்ளது. பல்லாயிரம் பேர் காணாமல் போயுள்ளதாக கூறுவது புலம்பெயர் விடுதலைப் புலி ஆதரவாளர்களின் திட்டமிட்ட இலங்கைக்கு எதிரான போலி பிரசார நடவடிக்கையே தவிர வேறு ஒன்றும் இல்லை இதனையே உள்நாட்டு வெளிநாட்டு ஊடகங்களும் பெரிதாக்கிக் கொண்டிருக்கின்றன.தற்போது இலங்கை பல்வேறு புதிய சவால்களை எதிர்கொள்ளும் நிலை ஏற்பட்டுள்ளது. பல்வேறு குழுக்கள் உள்நாட்டிலும் வெளிநாட்டிலும் இருந்து கொண்டு இலங்கைக்கு எதிராக செயற்பட முனைகின்றன. குறிப்பாக முஸ்லிம் அடிப்படை வாதம் இலங்கை முஸ்லிம்களை ஆக்கிரமிக்க முயற்சிக்கின்றது. இவ்வாறான செயற்பாடுகள் தேசிய பாதுகாப்பை அச்சுறுத்துவதால் புதிய உபாயங்கள் மற்றும் பாதுகாப்பு பொறிமுறைகளை இராணுவம் கையாள வேண்டியுள்ளது.பாதுகாப்புக்கு சீனாவின் நட்பு சீனாவுடன் இலங்கை நட்பு வைத்துக் கொள்வதாலோ சீனா இலங்கையில் செயற்படுவதாலோ எவ்விதமான பிரச்சினையும் இந்தியாவிற்கு ஏற்படாது என்றும் அவர் குறிப்பிட்டார்.சர்வதேச பாதுகாப்பு செயலமர்வின் அங்குரார்ப்பண நிகழ்வில் கலந்துகொண்டு நேற்று செவ்வாய்க்கிழமை உரையாற்றுகையிலேயே பாதுகாப்புச் செயலாளர் கோத்தபாய ராபக்ஷ மேற்கண்டவாறு கூறினார்.இலங்கையில் உள்நாட்டு பயங்கரவாதப் போர் முடிவடைந்ததன் பின்னர் தேசிய பாதுகாப்பு அபிவிருத்தி மற்றும் நல்லிணக்கம் போன்ற விடயங்களை முன்னோக்கியே அரசாங்கத்தின் செயற்பாடுகள் அமைந்தன. யுத்தம் முடிவடைந்து மிகக் குறுகிய காலத்திற்குள் வடக்கு மற்றும் கிழக்கை முழு அளவில் மீள் கட்டுமானம் செய்து பாதிக்கப்பட்ட மக்கள் சொந்த இடங்களில் மீள்குடியமர்த்தப்பட்டுள்ளனர். ஆரம்ப காலக் கட்டத்தில் இராணுவம் வடக்கு மற்றும் கிழக்கில் சிவில் நிர்வாகத்தில் பங்கேற்றிருந்த போதிலும் தற்போது அந்நிலை முற்றாக மாற்றம் அடைந்துள்ளது என்றார்.1983 ஆம் ஆண்டுகளில் ஜே. வி. பி. யின் போராட்டத்தினால் பாதிக்கப்பட்ட தேசிய அபிவிருத்தி அதற்கு பின்னர் விடுதலைப் புலிகளினால் மூன்று தசாப்த காலமாக அழிக்கப்பட்டது. இன்று முழு அளவில் ஜனநாயகம் ஸ்தாபிக்கப்பட்டு அமைதியான சமாதான சூழல் நாட்டில் காணப்படுகின்றது. பாதிக்கப்பட்ட தமிழ் மக்கள் உண்மையான நிலையினை உணர்ந்து தமது வாழ்க்கையை அமைதியாக கழிப்பதாகக் கூறினார்.இதனை சீரழிக்கும் வகையில் தற்போது பல்வேறு செயற்பாடுகள் நடைபெற ஆரம்பித்துள்ளது. குறிப்பாக புலம்பெயர்ந்த தமிழர்களும் தப்பியோடிய விடுதலைப் புலி உறுப்பினர்களும் இலங்கைக்கு எதிராக கடுமையான செயற்பாடுகளை பரந்தளவில் முன்னெடுக்கின்றனர். விடுதலைப் புலிகளின் சர்வதேச வலையமைப்பு இன்னும் இலங்கைக்கு எதிராக போராடி வருகின்றது. ஐ. நா. மனித உரிமைகள் பேரவையின் ஆணையாளர் நவநீதம் பிள்ளை இலங்கையில் வெளியிட்ட கருத்துக்களுக்கும் விடுதலைப் புலிகளின் ஆதரவுக் குழுக்களின் பிரசாரங்களுக்கும் இடையில் வேறுபாடுகள் இல்லை எனவும் சுட்டிக்காட்டினார்.விடுதலைப் புலிகள் இலங்கையில் அப்பாவி பொதுமக்களை குண்டுகள் வைத்து கொலை செய்ததை யாருமே பேசவில்லை. ஆனால் மனிதாபிமான நடவடிக்கை மூலம் விடுதலைப் புலிகளிடம் சிறைப்பட்டு கிடந்த பொதுமக்களை மீட்ட பின்னர் இராணுவத்திற்கு எதிராக போர்க் குற்றச்சாட்டுகள் மற்றும் மனித உரிமைகள் மீறல்கள் என பல்வேறு பிரசாரங்கள் மேற்கொள்ளப்படுகிறது எனவும் அவர் தெரிவித்தார்.காணாமல் போனவர்கள் என்பது புலிப்பிரசாரம் இறுதி யுத்தத்தின் போது பல்லாயிரம் பேர் காணாமல் போனார்கள் கொலை செய்யப்பட்டார்கள் எனக் கூறுவதெல்லாம் விடுதலைப் புலி ஆதரவாளர்களின் போலி பிரசாரமே தவிர உண்மை தன்மை இல்லை. இலங்கை அபிவிருத்தியை நோக்கி செல்கின்றது. இதற்கு தடையாக விடுதலைப் புலி ஆதரவாளர்கள் மாத்திரம் அல்ல பல்வேறு குழுக்களும் செயற்படுகின்றன. இவற்றை இனம் கண்டுள்ளோம் எனவும் அவர் தெரிவித்தார்.குறிப்பாக முஸ்லிம் அடிப்படைவாத அமைப்புக்களின் செயற்பாடுகள் இலங்கையில் தீவிரம் கண்டு வருகின்றது. இலங்கையர் என்ற அடையாளம் உள்நாட்டில் காணப்பட வேண்டுமே தவிர மதம் மற்றும் இன ரீதியான பிளவுகள் அல்ல. உலக அடிப்படைவாத முஸ்லிம் அமைப்பு இலங்கை முஸ்லிம்களின் அடையாளங்களை பிரிப்பதால் அவ் இனம் நாட்டில் அந்நியப்பட்டுப் போகும் நிலையே காணப்படுகின்றது எனக் குறிப்பிட்டர்ர. அதே போன்று ஆசிய வலயத்தில் இந்தியா பெரிய நாடாகும் அத்துடன் இலங்கையின் அயல் நாடாகும். ஆனால் தமிழகத்தின் பாராதூரமான செயற்பாடுகள் இலங்கை இந்திய நட்பை பாதிக்கும் வகையிலேயே காணப்படுகின்றன.மறுபுறம் சீனா இலங்கையில் பரந்து செயற்படுவதனால் இந்தியா உள்ளிட்ட ஏனைய நாடுகள் சில தவறான கருத்துக்களை ஏற்படுத்திக் கொண்டுள்ளன. இலங்கை சீன உறவு ஏனைய நாடுகளை பாதிக்காது என்பதை உறுதிப்பட கூறிக் கொள்ள விரும்புகின்றோம் எனக் குறிப்பிட்டர்ர.அதே போன்று தேசிய பாதுகாப்பிற்கும் வலயப் பாதுகாப்பிற்கும் சவாலாக காணப்படும் ஆயுதம், போதைப் பொருள் மற்றும் ஆள் கடத்தல்கள் எல்லை பயங்கரவாத செயற்பாடுகளையும் புதிய சவால்களை இனங்கண்டு இலங்கை செயற் படுகின்றது என்றும் அவர் குறிப்பிட்டார்.நல்லிணக்கத்தை ஏற்படுத்துவது சவாலானது – கோதபாய ராஜபக்ஷ நாட்டில் நல்லிணக்கத்தை ஏற்படுத்துவது சவாலான விடயம் என பாதுகாப்புச் செயலாளர் கோதபாய ராஜபக்ஷ தெரிவித்துள்ளார்.வடக்கு கிழக்கைச் சேர்ந்த மக்கள் மிக நீண்ட காலமாக தமிழீழ விடுதலைப் புலிகளின் கட்டுப்பாட்டில் வாழ்ந்து வந்த காரணத்தினால் தேசிய நல்லிணக்கத்தை ஏற்படுத்துவது சுலபமான விடயமல்ல என அவா சுட்டிக்காட்யுள்ளார்.நல்லிணக்க முனைப்புக்கள் துரித கதியில் மேற்கொள்ளப்பட்டு வருகின்ற போதிலும், முழுப் பலனையும் விரைவில் எதிர்பார்க்க முடியாது என அவர் குறிப்பிட்டுள்ளார்.கொழும்பில் நடைபெற்று வரும் சர்வதேச பாதுகாப்பு மாநாட்டில் கலந்து கொண்ட போது அவர் இதனைத் தெரிவித்துள்ளார்.வடக்கில் அனைத்து கட்சிகளும் சுதந்திரமான முறையில் பிரச்சாரப் பணிகளை மேற்கொண்டு வருவதாகக் குறிப்பிட்டுள்ளார்.பொருளாதார ரீதியிலான அபிவிருத்தியை ஏற்படுத்துவதில் பாரிய சவால்களை அரசாங்கம் எதிர்நோக்கி வருவதாகத் தெரிவித்துள்ளார்.சிங்கள கடும்போக்குவாதிகள் தலைதூக்கியுள்ளனர் – கோதபாய ராஜபக்ஷ சிங்கள கடும்போக்குவாதிகள் தலைதூக்கியுள்ளதாக பாதுகாப்புச் செயலாளர் கோதபாய ராஜபக்ஷ தெரிவித்துள்ளார். யுத்தத்தின் பின்னர் சிங்கள மற்றும் முஸ்லிம் கடும்போக்குவாதிகளின் செயற்பாடுகள் அதிகரித்துள்ளதாக குறிப்பிட்டுள்ளார். சிங்கள கடும்போக்குவாதிகள் மற்றும் முஸ்லிம் அடிப்படைவாதிகளின் செயற்பாடுகளை கட்டுப்படுத்தும் பாரிய சவாலை அரசாங்கம் எதிர்நோக்கி வருவதாகத் தெரிவித்துள்ளார்.கொழும்பில் நேற்றைய தினம் நடைபெற்ற பாதுகாப்பு கருத்தரங்கில் பங்கேற்ற போது அவர் இதனைக் குறிப்பிட்டுள்ளார். சில வெளிநாட்டுச் சக்திகள் இலங்கை முஸ்லிம்களை தனிமைப்படுத்த சமூகத்திலிருந்து விலக்குவதற்கு முயற்சித்து வருவதாகத் தெரிவித்துள்ளார். முஸ்லிம் மக்கள் இலங்கை சமூகத்துடன் ஒருங்கிணைந்து செயற்படுவதனை தடுக்கும் முனைப்புக்கள் மேற்கொள்ளப்பட்டு வருவதாகக் குறிப்பிட்டுள்ளார்.நவீன தொழில்நுட்ப சாதனங்களைப் பயன்படுத்தி நாட்டுக்கு எதிராக பிச்சாரங்கள் மேற்கொள்ளப்பட்டு வருவதாகத் தெரிவித்துள்ளார். ஜனநாயக சுதந்திரத்தை மக்களும் அரசியல் கட்சிகளும் பொறுப்புணர்ச்சியுடன் பயன்படுத்த வேண்டியது அவசியமானது என அவர் சுட்டிக்காட்டியுள்ளார். - See more at: http://www.newsjvp.com/srilanka/46522.html#sthash.0nvd91GP.dpuf
Geen opmerkingen:
Een reactie posten