பொதுமக்கள் இழப்புகள் குறித்துக் கவலைப்படாது தாக்குதல் நடாத்தும் நேட்டோ படையினர்

[ வியாழக்கிழமை, 07 ஏப்ரல் 2011, 11:35.06 மு.ப GMT ]
லிபியாவில் பொதுமக்களைப் பாதுகாக்க நேட்டோ தவறி விட்டதாக கிளர்ச்சியாளர்களின் தளபதி ஜெனரல் அப்துல் பத்தா யூனுஸ் குற்றம் சாட்டியுள்ளார்.
நேட்டோ படைகளின் தாக்குதல்களில் பொதுமக்கள் பெரிதும் பாதிக்கப்படுவதாக சுட்டிக் காட்டியுள்ள அவர், அதற்கும் மேலாக கடாபியின் படைகள் பொதுமக்களைத் தாக்கும் போது அவர்களைப் பாதுகாப்பதற்கான நடவடிக்கைகளிலும் காலம் தாழ்த்தியே செயற்படுவதாகவும் குற்றம் சாட்டியுள்ளார்.

இது தவிரவும் நேட்டோவின் விமானங்கள் லிபிய இலக்குகள் மீது மேற்கொள்ளும் தாக்குதலின் போது பொதுமக்களின் இழப்புகள் குறித்து கவலைப்படுவதில்லை என்று அவர் கடுமையான தொனியில் சுட்டிக்காட்டியுள்ளார்.

கிளர்ச்சியாளர்களின் கட்டுப்பாட்டில் உள்ள பெங்காஸி நகரில் வைத்து செய்தியார்களைச் சந்தித்த போதே கிளர்ச்சித் தளபதி ஜெனரல் பத்தா மேற்கண்ட குற்றச்சாட்டுக்களை முன்வைத்துள்ளார்.

லிபியாவில் கிளர்ச்சி ஆரம்பமாகும் முன்னர் ஜெனரல் பத்தா யூனுஸ் கடாபியின் அமைச்சரவையில் உள்துறை அமைச்சராக இருந்தவர். தற்போது கிளர்ச்சியாளர்களுடன் இணைந்து கடாபிக்கு எதிரான போராட்டங்களை முன்னணியில் நின்று வழிநடாத்துகின்றார் என்பது குறிப்பிடத்தக்கது.